PLEBISCITO.EU | PNV. Press News Veneto

Atension critica verso el progeto połitico autonomista-indipendentista de Veneto Libartà

Ancuò se gà tegnùo a Grixignan ła prexentasion de un novo sogeto połitico in faxe de gestasion, Veneto Libartà. Se trata de un pato tra diverse sigle del venetismo, che spasia dal’anbito autonomista fin a cueło indipendentista.
El Partito Nasional Veneto el varda co intarese ała senplificasion del cuadro połitico veneto, che de sicuro iuta anca ła cauxa del’indipendensa. Inte sti ultimi periodi ghe xe sta contati e diałogo cołe varie anime de sto sogeto połitico. Ghe xe sta anca inviti presanti a entrar a farghine parte come PNV.
Inte sta faxe gavemo preferìo no entrar parké no ghemo vuo sodisfasion sul’acetasion del nostro obietivo połitico, che resta l’indipendensa veneta, da otegnerse par mexo de un referendum tegnùo soto monitoragio internasional.
Da cuanto che fin deso xe emerso, el primo ponto de programa de sto novo ragrupamento el xe cueło del referendum de autodeterminasion del Popoło Veneto. Ła difarensa rispeto al nostro obietivo ła par de picoła entità, ma in realtà no ła xe afato banal.
Sicuramente xe stai fati pasi in vanti da parte de alcuni esponenti de sto ragrupamento, anca sel bałin resta saldo in man a chi che nei ultimi 20 àni se gà batùo par batalie perse, come l’autonomia, o el statuto special, riforme inposibiłi da otegner, parké ghe serve l’asenso dei 2/3 del parlamento tałian. Purtropo resta el pexo determinante de sti caregari (in primis personagi come l’ex sociałista Covi e l’ex fasista Comencini) anca inte’l novo sogeto e sto aspeto, insieme ała difarensa de obietivi, xe uno dei aspeti pì difisiłi da superar par catar un acordo. Xe infati ciaro che sti sogeti inprobabiłi, neła conta dełe preferense farà pexar el so mestier de połiticanti dal peło longo sul stomago e co ogni probabiłità i sarà cuei che ciaparà pì voti personałi, anca se magari ła so baxe che xe pì favorevołe al’indipendensa de łori (che resta autonomisti), sarà cueła che pol portarghe l’acua eletoral necesaria par sopravivar al’estinsion połitica.
Dita s-cieta, naltri gavarisimo preferìo un acordo tra PNV e movimento Veneti, come nucleo inisial dal cual magari alargar l’acordo co altri partiti/movimenti: inte sto modo el sogeto połitico el sarìa sta indipendentista fin dała nasita.
Ła strada che xe stada sielta invese xe n’altra e a sto ponto vedemo soło che do posibiłità par poder catar un cualche acordo: o sto sogeto se converte al’obietivo del’indipendensa sensa łe anbiguità mostrae ancuò, opur se gà da łavorar par na coalision eletoral, che anca in sto caxo gavarà come obietivo l’indision de un referendum pa l’indipendensa.
Insoma, suceda cuel che suceda, el PNV nol canbia obietivo, ansi lo rilancia co forsa: un Veneto Stato Indipendente, grasie al referendum pa l’indipendensa.
No semo mati, el xe un percorso legal, xà atuà in un mucio de novi stati nati inte i ultimi àni.
Stati picenini, ma un mucio eficienti, co poche tase e tanto senso civico e responsabiłità difuxa.

Gianluca Busato
Segretario PNV