PLEBISCITO.EU | PNV. Press News Veneto

Download comunicato

Ła contromosa tałiana suła comision storega che gà portà ała so bociatura da parte del masimo raprexentante deła Casta Veneta Giancarlo Galan, xe sintomo deła mancansa de comuni intenti al’interno deła magioransa in xonta regional. I patrioti veneti gà da desidar se restar s-ciavi dei tałiani o afondar un goerno regional anti-veneto.
_____________________

Trevixo, lì 29 de disenbre 2007 more Veneto

El Partito Nasionałe Veneto condana duramente łe parołe biforcute de bociatura deła comision storega regionałe sul Plebisito Trufa del 1866, pronunciae dal’ex venditor de publisità de Berlusconi, chel Giancarlo Galan xa sotosegretario ałe atività produtive in quota al partito liberałe tałian nel 1984, el steso odioxo partito risorgimentałista da do de briscoła par sento, ma de gran spesor tangentaro, dato che’l gavea come leader Francesco De Lorenzo e Renato Altissimo, tra i masimi esponenti dełe roberìe tałiane vegnue fora co tangentopołi.

El Partito Nasionałe Veneto nol dexmentega anca che xa al tenpo sto tristo personajo el gera conpagno de partito e de marendin de chel Fabio Gava che deso xe a so volta asesor regionałe e chel xe inpegnà nel darghe aria ała canpagna eletorałe pal 2010 grasie a połitiche de spexa piovega a favor dei “grandi eletori”, ma pagae coe tasche de tuti i veneti. L’exenpio masimo proprio de sti di xe el tentativo de sto qua de salvar ła fałimentare conpagnia aerea Alpi Eagles, exenpio grando de gestion diletantesca in salsa forsaleghista e che se merita soło che de sparir dal marcà.

Sta matrice conpagna de na clase dirigente veneta bona da gnente se no de spendar masa e mal i nostri schei, dimostra ła so inadeguatesa a portar vanti ła Cauxa Veneta pa conto nostro.
Xe anca da dir che chi che deso apogia połiticamente sto traditor deła nostra identità, ghe ne condivide l’asion in tute łe so conponenti e merita de esar considerà a pieno titoło parte de na Casta Veneta che dovemo tirar xo dałe spexe.

Pa sto motivo, el PNV lancia un apeło ai połitici veneti che se sente patrioti parché i abandone na magioransa regionałe antiveneta che ne vol s-ciavi e ignoranti deła nostra storia granda, deła nostra cultura che se fa vanto nei mejo muxei in volta pal mondo e nol vol che parlemo ła nostra łengoa.

Dal canto suo, el PNV se inpegna pa ła creasion de na nova clase dirigente veneta che spedisa al pì presto a lavorar sti mantegnui de połitici boni da gnente se non de spendar mal i nostri schei e ciaparse stipendi sensa far gnente de bon par naltri veneti.

Gianluca Busato
Comitato per la fondazione del
Partito Nazionale Veneto

Web: www.pnveneto.org
E-mail: info@pnveneto.org