PLEBISCITO.EU | PNV. Press News Veneto

Riportemo sta notisia dal sito de Raixe Venete, con un mucio de felisità:

—

http://www.raixevenete.com/forum_raixe/topic.asp?FORUM_ID=1&TOPIC_ID=4160

Ciao a tuti,

dopo mexi de laoro da parte de Asociasion culturali venete ghemo el gran piasere de prexentarve in anteprima l’ INO NASIONALE VENETO.
Dopo tante solecitasión e dopo on laoro longo, in colaborasion co tanti altri Veneti, ghemo méso in pie on Ino pal nostro Popolo, nato in ànbiti culturali al de sora de le ideolojìe polìtiche.

On Ino de tuti e par tuti: tuti i lo podarà cantàr e far sonàr in qualsiasi ocaxión (incontri, feste, convegni, partìe de balón, evc…).

La mùxica: la xe baxà so la “Juditha Triumphans” de Antonio Vivaldi, conpoxitór veneto, a che’l tenpo conposta so richiesta de la Repùblica Serenìsima de Venesia. La mùxica la xe stà aranjà dal maestro Luciano Brunelli.

El testo: el xe stà scrito da Ilaria Brunelli, Michele Brunelli e Davide Guiotto, tegnendo conto de le tante segnalasión e consiji che in sti mexi xe rivà da chi che la gà scoltà.
El testo el gà volésto raprexentàr tute le prinsipali caraterìstiche de la nostra xente: i valori, el concèto de Popolo e quindi de Nasion, la Lengoa e la nostra Storia, l’anbiente e el domàn. On domàn da portàr vanti tuti insieme!
Finalmente anca el Popolo Veneto el gà el so Ino Nasionale!

Podì scoltar tuto in anteprima su:
va’ al sito: www.raixevenete.net/ino-veneto

Come posì védare so quela pajina, da uncó parte na SOTOSCRISIÓN VOLONTARIA pa rivar a la cifra de 3.000 euro che i ne servirà par:

1- rejistrare l’Ino Nasionale co on coro profesionale e na banda de profesionisti
2- creàr CD da divulgar a tuti pa difóndar el pì posìbile l’Ino Nasionale
3- tirar sù on contributo spexe pa rivàr a far sonare l’Ino Nasionale come prima volta a la pròsima Festa dei Veneti.

Te dimandemo on to contributo pa sto projeto on mucio inportante: basta che te struchi so la copertina del futuro CD riprodota a quela pajina. Ogni caxèla che te struchi la val 50 euro de contributo volontario.

TUTI I NOMI DEI SOSTENITORI de l’Ino Nasionale
i vegnerà riportà el prima posìbile inte la lista qua sóto e i vegnerà stanpà sol retro-copertina del CD che vegnerà fato.

Grasie a tuti fin da dèso.
SEMO NA NASION

24 de xenaro del 2008.

—

senpre dal sito de Raixe Venete: 

SCOLTA IN ANTEPRIMA NA VERSION DE PROVA DE
L’INO NASIONALE VENETO (scarga in MP3)

Na bandiera, na léngoa, na storia
(Ino del Popolo Veneto)

Na bandiera, na léngoa, na storia
Le ne dà siviltà, forsa e gloria (e gloria!)
E ’l futuro splendor le tien alto
Del gran pòpolo fiol de San Marco (San Marco!)

Na nasion, un cor solo, na vóxe
Cei (1) e veci, toxati e tóxe
Che ’ntel cor i conserva ’l Leon
No i se ciama mai vinti,
I fa sù i fondaminti (2)
De un nóvo doman.

Ne dà lustro ’ntel móndo la nostra onestà
E la voja de far e de dare na man.
Fen fiorire (3) la tera dai mónti al mar
Defendémo la paxe e la libartà

Tuti insieme co un solo cuor
Tuti insieme na sola Nasion
Rento el cor conservémo el Leon
No sarémo mai vinti,
Fon (4) sù i fondaminti
De un nóvo doman.

Viva! Viva! Viva! Libartà!
Senpre! Senpre! Senpre! Libartà!

Par tèra, par mar: San Marco!