PLEBISCITO.EU | PNV. Press News Veneto

A TUTI I ISCRITI DEL COMITATO PNV
E AI SINPATIXANTI (co omissis)

Treviso, lì 25 de xenaro 2007 more Veneto

Ciao a tuti,

faso un rexoconto del’incontro de ieri sera, preso el Flyer de Trevixo.

Ricordo che sti verbali sarà un apuntamento fiso che seguirà ogni incontro del comitato PNV, nei limiti dele posibilità e dei tenpi a dispoxision, anca in seguito a na precixa richiesta da parte de qualche socio.

[omissis]

L’ordine del giorno gera el seguente:

• situasion połlitica veneta e generałe
• percorso verso ła costitusion del Partito Nasionałe Veneto
• organixasion teritoriałe
• elesion 2008
• Varie e eventuali

1. Sul primo ponto se gà fato un dibatito tra tuti i intervegnui. Se gà convegnuo suła gravità del momento, ma anca sul’oportunità połitica che se gà verto. Xe emersa l’exigensa de crear na nova clase dirigente in presa.

2. Sul secondo ponto xe sta fate alcune domande. Riporto łe prinsipałi.  

• [omissis]: Parché dal movimento Veneti al PNV?
• [omissis] (PNE): Xe giusto far un partito deso? No xe mejo far un comitato?
• [omissis]: Quałe xełi i confini deła Venetia?
• [omissis]: Sul nome, no xe mejo ciamarlo partito indipendentista, invese che nasionałe?
• Se deve partesipar ałe elesion połitiche?
• Se deve partesipar ałe elesion aministrative?

Łe risposte no vien riportae par brevità, anca parché xa łe xe stae date anca in precedensa ai iscriti. Emerge l’exigensa de riusir a far un congreso costituente entro un tempo masimo de 2-3 mexi, posibilmente prima dełe elesion połitiche. A sto propoxito, ogni socio del comitato gà da riusir inte sti mexi a coinvolgiar el masimo numaro de persone sensibiłi al tema pa dar pexo al’evento. El congreso dovarà esar na sede in cui tuti i iscriti espone łe so texi e se pronuncia in modo ativo.

3. Terso ponto. Xe sta prexentada in sintexi ła proposta de crear na organixasion inovativa, un mucio distante dal clasico partito piramidałe vertisistico dei grandi partiti de masa del novesento, che riflete anca l’organixasion de tuti i partiti de deso.

L’organixasion xe de tipo orixontałe, a do livełi:

• el liveło baxe xe i nuclei teritoriałi, che gà na estension comunałe o al masimo sovracomunałe. Ogni nucleo gà un so coordinator e tuti i nuclei xe a contato direto co
• el liveło sentrałe del PNV, che in realtà xe na rete ad architetura połisentrica, suła baxe deła carateristica de sviłupo urbano e umano dei veneti da 3.000 ani a sta parte,

unìa, atraverso un pato federativo, da un obietivo comun:

• l’otenimento del’independensa, atraverso un referendum de autodeterminasion organixà dała Region Veneto, cui se aconpagna o segue altri referenda inte st’altri teritori deła Venetia)

e da quatro forti prinsipi condivixi:

1. acetasion del prinsipio de proprietà privata, come conseguensa del dirito naturale deła libartà del’individuo;
2. acetasion dei prinsipi di legitimità democratica e deła “non aggresion” (cioè el prinsipio deła non-viołensa, sensa par questo parò rinunciar ała legitima difexa se necesaria);
3. rifiuto de ogni forma de discriminasion rasiałe, sesista, łengoistega, de convinsion rełigioxe, fiłoxofiche, o połitiche;
4. acetasion dełe norme de dirito internasionałe,

oltre a na normałe regoła de bon conportamento siviłe, propoxitivo e non distruttivo dełe opinion altrui.
In generałe, se gà convegnuo che ognun, nel so comun e nel so teritorio slargà de rexidensa e atività, el gà da farse promotor in prima persona del’organixasion de incontri pioveghi (anca in bar, o in luoghi non costoxi) par prexentar el PNV e crear l’oportuna conosiensa e el consenso popołar suła so proposta. A sto propoxito, vegnarà fornìa a ognun, ła lista dełe persone iscrite, o sinpatixanti del PNV par crear i primi nuclei e scumisiar el lavoro teritoriałe. Ognun, nel so teritorio, deve sentirse referente del PNV.
Ogni elemento del PNV, sipia un menbro, sipia un nucleo, o altro, el mantien łe so prerogative e libartà de asion e carateristiche spesifiche, al de fora dei elementi comuni del foedus che le unise.

4. Quarto ponto. Tra i prexenti, prevałe l’opinion che no sipia oportuno prexentarse ałe elesion połitiche pa diverse raxon de prinsipio, połitiche, organixative e de oportunità. A ogni modo ła decixion su sto ponto speta a un congreso costituente del PNV. Sułe elesion aministrative e europee emerge invese l’opinion che sipia el caxo de darse da far par coverxar al pì posibiłe le varie scadense.
In particołare in alcuni comuni del padovan e del venesian xe squaxi sicura ła partesipasion ałe prosime comunałi co ła sigla PNV. Su Trevixo e Vicensa bixogna strinxar i tenpi pa no perdar l’ocaxion de vixibiłità che se prexenta.

5. Quinto ponto. Se convien che se farà a breve altre riunion a Padova e a Vicensa (o Verona).

Gianluca Busato