PLEBISCITO.EU | PNV. Press News Veneto

Riportemo el discorso de investitura del segretario del pnv, del congreso costituente del 18.05.2008

—

Cari soci e amisi del partito nasional veneto,

se trovemo nel sentro del Veneto par un evento storico.

Un paradoso xe che chi xe qua forse se ne rende conto soło che in parte. Infati naltri semo atori de un proceso in corso e femo fadiga a vedar i efeti deła nostra asion e dełe dificoltà dei nostri aversari połitici, inpegnai come che semo nel dibatito interno e intorno ałe pì alte concesion politiche che ancuò xe prexenti inte ła Venetia.

Eco che invese, nel giro de pochi mexi, intorno a naltri se gà moso un teremoto połitico epocal.

Xe ormai na settimana che sui giornałi veneti se parla deła costitusion de un novo partito autonomista veneto, sul modeło dela SVP in Sud Tiroło. El dibatito xe portà vanti praticamente da tuti i esponenti politici del pdl e del pd del Veneto e anca del Friuli-Venezia Giulia.

Luni sarà in libreria el libro del governator del Veneto che se prexenta come el deus ex machina del nord-est (el continua a ciamarlo cusì, anca se no se capise a nord-est de cosa, forse el vol candidarse a sindaco de Tarvisio?).

Dal dibatito xe asente ła lega, parché co tuta evidensa a liveło regional se sta pareciando un confronto duro suła leadership tra sto novo partito autonomista e la lega stesa. Un confronto che vedarà forse na coalision unica prexentarse a Venesia par łe prosime elesion regionali del 2010. Na coalision ndoe che i esponenti che se prexentarà al voto gavarà xa ciapà łe so decixion prima par quel che riguarda posti de poter e careghe. Spetemose anca na nova lege eletoral, che ricalchi queła dełe politiche e no stemo meravejiarse se sarà cusì.

Cioè in picoło, el modeło che vegnarà parecià par el 2010 xe queło de roma, co ła lega al posto de Berlusconi e Galan al posto de Veltroni.

El LEGALAN, insoma.

Ma semo proprio sicuri che ne convegna sto xogo a naltri veneti?

[Lexi tuto el discorso kive]