PLEBISCITO.EU | PNV. Press News Veneto

Da on decenio ła Banca Mondiałe ła rancura su diversi dati da tuti i paexi del mondo e ła parecia na graduatoria sul liveło de Governance (Governance Matters), cioè l’eficensa dełe istitusion publike su diversi temi. Ghe xe na serie de indicatori fra cui: i) Control of Corruption ke stima el liveło de corusion rento łe istitusion publike; ii) Rule of Law indica ła capasità de far rispetar i contrati, ła proprietà privata, l’eficensa dei tribunałi e el controło deła criminałità; iii) Regulatory Quality ke sarìa ła capasità governativa de far na połitica ke promove el setore privà; e iv) Government Effectiveness, cioè el liveło del servisio publico a dispeto de presioni połiteghe.

Se da par scontà ke ała baxe de no sviłupo economico ghe vol on bon liveło de Governance: l’eficensa istitusionałe sta ała baxe del benesere de n’economia. Par sto motivo in ste graduatorie vien mesi rento anca i paexi industriałixà ke i fa da primi deła clase. Eco ła clasifica par bona parte dei paexi osidentałi (paexi OCSE) par via de Rule of Law:

El cołor xało par l’Italia no ło go mia xontà mi, ma xe doparà deła Banca Mondiałe par indicar i paexi pì mediocri in fato de Governance. Ormai no xe pì sorprendente védar l’Italia fra i ultimi paexi osidentałi in fato de eficensa istitusional. Se semo bituà a esar sucubi de on sistèma ke ne sófega in ogni maniera.
I dixe ke ogni pòpoło el se merita el so governo, ma mi no credo mia ke noialtri vèneti se meritémo sta desgrasia. Vardo i sviseri, i irlandexi, i olandexi, e no vedo mia parké łori i se ga da meritar on sistema istitusional tanto pì eficente ke ghe parmete de prosperar. Xe vero ke noialtri veneti gavemo tuti i nostri difeti, però i veneti ke conoso mi i xe anca primi in senso civico, in vołontariato, in donasioni, in te’l laoro. Se ogni popoło el se merita el governo ke’l ga, se meritemo veramente on governo arabo?.
Sti dati ke riporto i xe disponibibiłi par tuti (Governance Matters). No i xe na novità. I xe stà doparà in pasà par susitàr indignasion e vegnarà prexentà da tanti altri par ulteriori brontołamenti. El problema xe ke i vien anałixà in maniera superficiałe come se fose colpa de on partito o de staltro, come se bastase mandar caxa tuta ła clase połitega par netar fora el sistema. In realtà ghe xe on problema struturałe ke va oltre i individui parké xe el sistema ke xe smarso. Ghe xe na decadensa ke ła va vanti da ani. Par rendarse conto de sto trend, ve taco on paragon fra Italia e Ghana par Rule of Law (ma tanti altri paexi xe drio sorpasar l’Italia):

No se ga da desmentegarse ke ghe xe na corełasion fra ineficense istitusionałi e sviłupo economico. Sta decadensa istitusionałe taliana ła xe drio trar xo ła nostra economia. Me vien sgranfo a pensar ke el potensiałe veneto, baxà su senso civico, operoxità e onestà, el vien metodicamente sofegà da on parasita istitusional da terso mondo. A sto punto no ne resta ke o spetar co ansia el sorpaso del Ghana, o far sentir, in maniera civiłe, ła nostra voxe.

Lodovico Pizzati
Coordinator Comision Economia
del Partito Nasional Veneto