PLEBISCITO.EU | PNV. Press News Veneto

Molto interesante e stimolante l’intervento de Lodovico Pizzati che ringrasio par le acute oservasion e par ver riporta’ la testimoniansa de Luisa Mocenigo.

Xe vero che nialtri Veneti semo famoxi, oltre che par la nostra laborioxita’, precixion e tenacia, par la nostra toleransa (che i ocupanti foresti, PREMEDITATAMENTE, i ga marca’ come “servilixmo”, mentre se fonda so na capacita’ de “vedar distante”) e cuesta la xe parte del la nostra antica eredita’ de Popolo tra i pi’ antighi in Europa, no a caxo co pi’ de un milenio de autogoerno stabile, benestante e, par quei tenpi, democratego.

Infati, siben no exente da difeti, el Stato veneto el ga funsiona’ mejio de tuti staltri in Europa, sia come precixion che cofa’ funsionalita’ (parfin da la burocrasia!) e juistisia, in cuanto le istitusion, salvo cualche ecesion, tegneva senpre conto “in primis” dei so citadini. Cuesto ga influensa’ in profondita’ el modo de pensar e de comportarse de le Xenti de la Venetia.

E no xe del tuto vero che semo tanto mesteghi, la nostra indipendensa e libarta’ la ghemo difesa co le armi e co l’eroixmo de tute le clasi sociai nte i secoli e no a caxo ghemo sconfito Stati molto pi’ grandi e potenti del nostro.

Xe da metar in conto anca che la revolusion francexe, co el fondamental aiuto de la finansa marsona, ga scardina’ scuaxi tuti i Stati europei e stravolto l’aseto del nostro Continente, cosi’ come la forte propaganda de “fradelansa taliana e universal” la gavea fato adepti segreti (carbonari) tra la clase mercantil e burocratica de lo Stato veneto… ricordemose che i Veneti se ga reolta’ contra l’invasion francexe (mejio dir internasional) NONOSTANTE i ordini contrari de on Majior Consejio, romai infiltra’ da “cativi consilieri”.

Parfin contra el dominio militar ostriaco ghemo fato valer la nostra forsa e corajio ribelandose co le armi e rexistendo scuaxi un ano e mexo (17 Marso 1848 – 22 Agosto 1849!) a uno de i pi’ forti exerciti d’Europa (gnanca Napoleon el jera riusio a vinsarlo)… contra i 5 “glorioxi di’” de Milan…

Dopo la Guera del 1866 contra i perdenti savoiardi e co i taliani incapaci de goernar ben, avidi e ignoranti, xe crola’ da novo tuto el sistema e xe scominsia’ l’exodo de le nostre popolasion par el Mondo co l’impoverimento material, moral e comersial de cuei che jera rimasti.

La Prima Guera Mondial xe sta’ el pi’ gran disastro che ghemo subio… interamente conbatesta sol nostro teritorio (primi par corajio e rexistensa i soldai veneti che volea difendar el SO teritorio), siben vinta la xe stada na rovina conpleta e ne ga sotomeso ncora de pi’ a paroni e maestri foresti. Altro esodo in giro pal Mondo a sercar laoro.

Pochi ani e el Fasixmo, se da un lato gavea rimeso ordine al caos talian, da l’altro xe sta na xventura par la democrasia e par l’opresion violenta de la nostra (e de altri Popoli) identita’.

Cualche ano ncora e co la seconda Guera Mondial altro disastro completo ed altra emigrasion de masa.

Co l’avento de la Republica taliana xe scominsia’ un periodo de paxe ma anca de colonisasion rapida e sientifica dovesta a cinema e a la television, l’arma de propaganda pi’ potente de tuti i tenpi… ma gnanca co sto mexo se ga inpedio del tuto a nialtri Veneti de capir chi che se xe e cosa se raprexenta.
Parche’ sta gran opresion e mistificasion sora de tuto so nialtri Veneti? … Parche’ semo sta’ e semo el pi’ gran “pericolo” storico, cultural e economico par lo Stato sentralista e mafioxo talian.

Ma, se da na parte la colonixasion de la Republica taliana la xe sta pi’ invaxiva e totalitaria, da n’altro lato, la posibilita’ de lexar, studiar, movarse e scanbiar pi’ apertamente opinion ga favorio el riemerger de le verita’ storiche e el difondarse da novo de la nostra identita’, mai sconparsa nel tenpo e al di’ de anco’ magari na scianta defilada ma sicuramente majioritaria.

Sta a noialtri deso a rivendicarla e concretixarla, i tenpi i xe maduri. 
 
Fabio Calzavara
Partito Nasional Veneto