Independensa del Veneto: un virus de felicità che canbia ła połitica veneta

In sti dì semo drio verxar na nova pajina de storia.
Un fiło ideałe che vien da Perasto e che Bepi Viscovich ne gà portà ai nostri tenpi come testimone de na stafeta nel nome deła sovranità dei Veneti e del’indipendensa del Veneto.
Ghe sarà un dì prima del’ingreso nela politega veneta del Partito Nasional Veneto e un dì dopo.
No sarà pì ła stesa storia, parché ła canbiemo naltri.
El nostro progeto połitico se ciama indipendensa del Veneto e deła Venetia.
L’autodeterminasion del Popolo Veneto xe na riforma legal. Eco parché:

El prinsipio de autodeterminasion dei popołi xe na norma de dirito internasional general e inderogabile che produxe efetti giuridici (diriti ed oblighi) par tuta ła Comunità dei Stati. El xe entrà in vigor da naltri co Lege statal n. 881 del 25 de otobre 1977 (ratifica ed execusion del pato de New York), che dixe che “Tuti i popołi gà el dirito de autodeterminasion. In virtù de sto dirito, i deside liberamente del so statuto połitico e persegue liberamente el so sviłupo economico, social e cultural”.
El popoło Veneto trova definision legal secondo l’art. 2 deła Lege statale n. 340 del 22 de magio 1971, che dixe che “L’autogoverno del Popoło Veneto se atua in forme rispondenti ałe carateristiche e tradision deła so storia”.
Grasie ała Lege statal n. 85 del 24 de febraro 2006, xe consentìo esprimar opinion e far asion democratiche e no viołente par otegner l’independensa de teritori che deso xe inglobai inte el stato de cui fa parte el Veneto. Val a dir che naltri podemo agir democraticamente e pasificamente pa portar vanti l’autodeterminasion del Popoło Veneto e otegner in modo no viołento l’independensa del Veneto.

Ma quałi xei i vantagi del nostro progeto politico rispeto ad altri?

Inte i ultimi trent’ani ghe xe stae un mucio de proposte połitiche par asicurar ai Veneti pì doxi de autonomia połitica e federalismo.
Tute ste proposte se gà baxà sul prexuposto che doveimo ndar inte’l parlamento e nel governo sentral par ragiungiar l’ obietivo auspicà da tuti naltri Veneti.
Ma cosa se pol far inte’l parlamento e inte’l governo sentral?

modificar ła costitusion par realixar el federalismo o strapar forme de autonomia par i veneti.
modificar łe legi del stato par otegner mejo procedure aministrative locałi, inte’l quadro del’atual costitusion.
grasie ała presion sul governo strapar qualche vantaggio inte łe concesion governative.

Naltri dixemo: tuto ciò fin deso no gà portà gnente ai Veneti.
Dixemo inoltre che xe anca inposibiłe otegner qualcosa a cauxa del bilancio del stato tałian gravemente conpromeso e che no pol permetarse de perdar łe risorse fiscali venete, senò i entra automaticamente in bancarota nasional come l’Argentina qualche ano fa, pa l’aumento vertiginoxo e insostenibiłe del debito publico sora el pil, a livełi sora el 120-130%. E anca se i conti del stato i fuse a posto, el poter politico deła criminałita organixada no ne concedarìa proprio gnente. E tuto questo spiega parché fin deso no ghemo otegnuo gnente e no otegnaremo niente continuando su chel fronte.
In virtù de questo, naltri afermemo che l’autodeterminasion co l’independensa che ne consegue xe pì conveniente par el Veneto parché:

xe pì fasile da realixar rispeto a altre riforme, parché basta che ło vołemo naltri veneti
finalmente ghemo tuti i strumenti połitici e legałi
in Ocidente i la gà otegnùa, o xe drio otegnerla tuti i Popołi che ła gà exercitada

In tanti ne gà dito che el progeto del PNV xe beło, bełisimo! Ma, sempre ste persone continuava in modo disiłuxo: “ma faxìo sul serio, ma ghe credeo? No vedè che xe inposibiłe?”
Come dar torto a ste persone? Come no capir che anca el progeto pì grando de sti tenpi el gà da scontar el preso deła dixiłuxion de tuti naltri. Ła dixafesion nei confronti deła połitica ła xè granda, sconfinada.
In sti ani xe stai fati tentativi. Bixogna dar ato anca ad alcune forse połitiche de ver contribuìo a na magior conosiensa deła cauxa veneta. Parò fin deso e come tuti pol vedar un dì drio st’altro sta roba fin deso no ne gà portà gnente de concreto par naltri Veneti.
Ma quało xeło ałora el motivo par cui deso dixemo che ghe xè i elementi par otegner l’indipendensa in tenpi ragionevołi?
Prima de tuto parchè – come che ghemo pena visto – deso xè legalmente e giuridicamente posibiłe otegner l’indipendensa.
In secondo luogo parché altre strade xè stae tentae in sti ani e tuti ghemo visto come che ła xè ndada. Sta roba, se da na parte xè sta un fałimento, da st’altra ne gà verto i oci sul’inposibiłità de ndar vanti a ripropor formułe fałimentari.
Errare humanum est, perservare diabolicum, i dixeva.
Ma ła vera granda novità xè che nei ultimi 10 ani ghe xè sta tre grandi sconvolgimenti par tuta l’umanità.
El primo fator xe l’organixasion. I moderni sistemi organixativi flesibiłi – e el PNV xe un moderno sistema organixativo flesibiłe – consente a grupi conposti da senpre manco persone de crear canbiamenti senpre pì grandi.
El secondo fator xe ła Comunicasion.
El primo strumento de comunicasion che ghemo naltri veneti xè ła łengoa. Ła nostra łengoa Veneta, che tuti i veneti parla e apresa: pur co le varianti da posto a posto, co parremo veneto tuti i veneti ne capise!
Sempre su sto ponto, anca łe nove forme e tecnologie de comunicasion ne gà canbià el mondo: co ła magior parte de naltri xe nata, no ghe gera personal conputer, no existeva Internet, no existeva i celulari, no ghe gera i ipod, i iphone e tute łe diavołerie che vedemo nasar ogni dì e che gà creà ła tersa granda novità, che xè el canbio dei conportamenti pì importante dei ultimi 10 anni, che se ciama VIRAŁITÀ.
Cosa vol dir virałità? Vol dir che na idea se espande ała vełocità de un virus pandemico e travolge el prexente, travolge i macigni che deso i ne par inamovibiłi.
Valtri letori del blog del PNV sé ła testimoniansa pì granda de sta roba: gnanca co na canpagna de comunicasion milionaria un qualsiasi partito, na qualsiasi coałision de partiti gavarìa mai poduo portar tanti Veneti a lexar sti conceti in cusì poco tenpo!!!!
Eco parché ła prosima faxe połitica che sta par verxarse in Veneto se ciama independensa!