Caucaxo: xe in xogo ła libartà

I referenda del’Osetia del sud, del’ Abkhaxia e deła Cecenia ghe someja al plebiscito trufa del 1866. Tbilixi 2008 come Berlino 1948?

[Treviso, 15 agosto 2008]. I dì de feragosto, che antisipa l’autuno caldo 2008 che i veneti ris-cia de ver a cauxa del’opresion famełica del stato tałian, i vede s-ciopar na guera inte na tera lontana, metà Europa metà Axia, metà cristiana metà islamica, un bresparo de etnie, łengoe e rełigion che nisuni pol autorevolmente definir in modo univoco co na ciara letura e interpretasion che posa esar condivixa da tuti.
Un comento sui fati xe difisiłe, parché łe fonti xe inquinae e no se capise realmente cosa che sipia drio sucedar, a parte l’ovio pexo dei forti intaresi energetici, pì che dei diriti dei Popołi. Manco de tuti ło capise el ministro dei afari foresti taliani Frattini, che preferise infati starsene cołe bałe al mojo al mar ale Maldive, pagà da naltri, intanto che el resto del mondo discute del tema.
Un ponto inportante par naltri independentisti veneti xe che parte del contendar xe dovùo ała lota independentista del’Osetia del Sud, region autonoma deła Georgia, che vede ła prexensa de un governo indipendente guidà da Eduard Kokoity e del’Abkhaxia, altra region, guidada da Sergei Bagapsh, che domanda l’independensa da Tbilixi.
Molti se domanda parché el PNV no se gà lancià inte ła difesa de uficio dełe istanse indipendentiste dei Oseti del sud e dei Abkhaxi.
Ła raxon xe senplice: sti Popołi no gà seguìo un proceso democratico, anca i do referenda independentisti tegnui nel 1991 e nel 2006 in Osetia del Sud gà escluxo gran parte del Popoło Oseto dal poder partesipar al voto (se parla de un 30-40% almanco), el steso val par el referendum tegnùo in Abkhaxia nel 1999, cusì come ła farsa del referendum ceceno del 2003. Tra l’altro tute ste region xe ogeto de cołonialismo forsà, speso par man rusa, tanto da distrugiar popołi intieri come queło ceceno, o far scanpar minoranse etniche, come i 100.000 Ingusi scanpai nel 1991 in Ingusesia dal’Osetia del nord fiło-rusa. El steso cołonialixmo e rusificasion forsada portada vanti da Stalin co łe so tristemente famose “purghe” anca nei Paexi Baltici e in gran parte del’ex URSS.
No tegner prexente sti aspeti de legitimità democratica par naltri veneti ancuò vol dir ver poca memoria storica e dixmentegarse par exenpio che sti referenda i par tante riedision del vergognoxo plebisito trufa del 1866 che ne gà aneso al’Itałia e che gà costreto ała diaspora de un mucio de profughi veneti in volta pa’l mondo.
Ancor pì grave xe no tegnerghene conto nel momento in cui semo drio progetar ła nostra independensa, par mexo de un referendum. El mancà riconosimento internasionałe dei referenda-farsa caucaxici ne dimostra che sbalia chi che vol crear na anagrafe veneta separada e autogestìa rispeto ai atuałi rexidenti deła Region Veneto co citadinansa tałiana.
In realtà se fa fadiga a capir ben cosa che sipia drio sucedar in Caucaxo, ła guera ancor prima che miłitar xe mediatica e da n’altri l’amicisia anca personal del ditator informativo al poter inte’l stato tałian co l’omo forte de Mosca, uno dei do contendenti, no ne favorise tanto a distinguar par ben cosa che sipia vero e cosa che sipia buxie.
Na ciave de letura particolar mi parò ła gò.
Inte i dì cruciali del 7-8 agosto co xe partìa ła question, gero infati a Berlin, che xe un ponto de oservasion particołare e dirìa unico par vałutar i fati euroaxiatici.
Ła xe ancora vivo e forte el ricordo de un regime comunista opresivo e contrario ała libartà del’omo, tanto da riusir a crear un muro no soło inte na stesa sità, ma inte un steso quartier, dividendo mare e fiołi, da un dì a st’altro, inte ła note del 12 de agosto 1961. Xe ancora forte el ricordo de un bloco logistico, sempre ordinà da un dì a st’altro dal’Union Sovietica el 24 de giugno del 1948, che mirava a spegnar na sità intiera, tegnùa in vita par mexo de 278.228 vołi dei Rosinenbomber (che vol dir “bonbardieri de uveta”) dei ałeati osidentałi che gà permeso ła sopravivensa de Berlino Ovest par 15 longhi mexi.
Eco che me fa pensar un mucio mal el lexar in sti dì tante lodi nei confronti de Vladimir Putin, che par tanti ani gà fato parte, proprio in pianta stabiłe nel’ex Germania est comunista de una dełe pì crudeli organixasion creae dal’omo, el KGB, l’intelligence sovietica, organixasion criminałe superada forse soło che dała Gestapo naxista.
Sicuramente el governo georgian nol xe un exenpio de purixmo democratico e de rispeto dełe minoranse etniche e łengoistiche che ansi xe stae de frequente no rinosue e calpestae co l’uxo deła viołensa, anca a cauxa de na clase politica che nase col visio del dirigixmo comunista, ma xe anca sicuro che Putin, che pur xe un omo in ganba e ancà un mucio amà dai rusi – forse un pochetin parché i ghe ne gà anca paura :- ) – de sicuro no’l xe el stinco de santo che bona parte de giornałisti e połitici co ła benedision del so amigo Berlusconi (n’altro de bon…) i vol farlo pasar.
Eco parché ritegnemo che se el Veneto fuse indipendente el dovarìa vałutar a fondo se promovar e aderir a un aiuto internasionałe verso Tbilixi, partecipando a un ponte aereo de sostegno umanitario verso ła popołasion georgiana soto asedio de Mosca.

Gianluca Busato
segretario Partito Nasional Veneto
Web: www.pnveneto.org