PLEBISCITO.EU | PNV. Press News Veneto

Senpre pì xente vede el Partito Nasional Veneto come na concreta alternativa al status quo de na politica tałiana portada vanti da chi magari se inpenise ła boca de Veneto par dopo portarse i so voti sul stavoło tałian, a farse i so intaresi e quei dei tałiani.
Dixemoło ciaro, la Lega e el PDL i serca de trategner l’eletorato veneto co ła scuxa del’anticomunixmo, quando che łori i xe comunisti al pari de st’altri. Comunisti e statałisti de prima grandesa, come che dimostra ła vicenda Alitalia. Ła Lega pì del PDL, che in Veneto el xe in debito de osigeno e prosimo a sparir.
Domenega scorsa ghe xe stada na novità. Par ła prima volta Luca Zaia xe sta contestà a caxa soa.
Qualcuni dixe che el grupo de contestatori el gera picenin. Sicuro, ma anca el gà dimostrà de esar spontaneo e de no vołerse pì sorbir łe bałe de na clase dirigente che da trent’ani i promete i promete par dopo ndar senpre xogar i so asi in Italia e no in Veneto, sensa rixultati.
Anca quando che i promete ben, proprio come Luca Zaia, che mi personalmente considero na persona par ben e un veneto de gran quałità e capasità, dopo parò i fa l’eror anca łori de tornar là, nel tenpio del mal asołuto par naltri veneti.
El so problema, el problema dei leghisti veneti in general, come de tuti i partiti tałiani, el xe che i xe poco consapevołi deła grandesa del Popoło Veneto. No i gà fiducia in sé stesi e – quel che xe pexo – in naltri veneti. Par sto motivo i preferise farse magnar dai lonbardi, dai romani, dai tałiani in genere, pur de ciaparse qualche carega. Eco che vien fora el ritorneło: “ghe vol tenpo par sistemar i dani de deceni fati da altri, łasene lavorar”. Ła realtà xe che ła xe na scuxa beła e bona. Xe senplicemente inposibiłe otegner qualcosa a Roma. I motivi i ghemo ripetui pì e pì volte.
No ło parmete el bilancio fiscal, che nol pol rinunciar ałe risorse venete sensa ndar in bałon, no ło parmete ła casta połitico-criminal che ła vive e ła magna a sbafo coi nostri schei e no ło parmete un sistema clientelar baxà sul furto deła nostra dignità e del nostro lavoro.
Ła nostra libartà ła se conquista qua, in Veneto, scumisiando a desidar da naltri el nostro destin, cavandose dała tutela dei tałiani, che i gà dimostra in sentoquarant’ani e pasa de esar boni da gnente, parché l’Italia no existe come Nasion.
Naltri del PNV individuemo na strada, che xe queła del’independensa deła Venetia, scumisiando dal Veneto.
Sta strada gera un troxeto de pochi fin a soło 2-3 mexi fa, ma semo drio cresar in presia e cresaremo senpre de pì.
Eco parché deso ła Lega scumisia a ver paura.
No ła ga paura soło parché Zaia xe sta contestà, ma soratuto parché i gà vista la coa al gaxebo ndoe che se tirava su łe firme par l’independensa.
No savemo se ghe metaremo un àno, do o tre, ma el destin el xe segnà, la batalia tra łori (i cativi) e naltri (i boni) ła xe scumisiada.
L’inpero del mal vegnarà buta xò e i veneti conquistarà la so libartà!

Gianluca Busato
Segretario PNV
—
eco un breve video dela parte de mexo dele contestasion a Zaia: