Deso ve conto, deso ve digo: su e xo pai marcà finansiari (parte prima)

Xe on tòco ca voria scrivar so sta crixi finansiaria, anca parké pì de calkedun me ga dimandà na opinion. In sta prima parte a ve dago na spiegasión ała bona de cosa ke xe suceso.
Tuti savémo del croło imobiliar merican. No xe na gran novità e a dir el vero el groso xe xa capità on paro de ani fa. Tuto somà sto cołaso imobiliar no xe sta cusì grave come ke se vol far credar, e se fose soło cueło łe banke łe podaria farghe fronte sensa problemi. A grandi linee, eco cosa ke xe suceso:

A. La boła imobiłiar:

Greenspan gavéa sbasà i tasi de interese merican par stimołar l’economia (post 9/11, post croło Nasdaq, e anca tanto par presión połiteghe, anca se in teoria ła Fed ła dovaria esar indipendente dal presidente).
Co tasi basi xe stà manco costoxo torse on mutuo so ła caxa, e tanta xente ga tacà cronpar. Tanti cronpadori ga fato nar su el vałor dełe caxe. Se ga formà on vortise (na boła) parké tuti cronpava caxe par rivendarle dopo on ano anca al triplo (e tanti i ga fato skei).
Col vałore dełe caxe ke inpenava deventava manco riscioxo dar mutui, e tante banke łe ga mołà de far controłi (i ghe dava prestiti a xente parfin el dì ke i vegnea fora dała gałera). Altre banke, pur de dar sti mutui, łe ofriva par breve tenpo mutui a taso soto marcà (subprime).
Bon, come ogni boła, ła ga mołà de sgionfarse e ła xe sciopà. Fin ki gninte de novo: xe l’efeto inbriagamento ke a volte el marcà libaro el ga par via de na vixion masa miope. El rixultà xe ke no se riusìva pì a vendar caxe a alto preso, e tanti no i xera pì boni de pagar el mutuo.
Le banke co ke fa prestiti łe se speta ke 1 su 100 no xe bon de ripagar. I ło tien da conto, parké tanto i ghe fa bastansa skei su staltri 99. Eco, dixemo ke co sta crixi sta persentuałe ła se ga alsà a 3 su 100. Na bruta bota, ma no ła fine del mondo (anca parké almanco ghe restava in man l’imobiłe). Ałe banke ke ga tolto masa risci ghe xe stà ben.
Oltre a on radopio de mutui ndà in małora, se ga da xontar on secondo efeto. So na caxa ke val 100 de sołito na banca ła inpresta 80 (o manco). Invese, pur de inprestar (“parké tanto el vałor el va senpre su”) łe banke łe rivava a dar anca 95. Eco ke co ke i presi i se ga tibià, ste banke łe se ga catà in man dełe caxe ke łe vałeva 60 (o manco).
Sti do efeti łi xe sta considerevołi, ma no da fine del mondo, anca parké (tanti no ło sa) ghe xe posti dove el marcà el ga tegnù bota e i xe parfin in cresita. E no stè gnanca pianxar masa par łe persone ke ga fato bancarota su sti mutui, ke i xera tuti motivà dała specułasion (par rivendar caxa e far skei).

Ma ałora se sta crixi imobiłiar no xe cusì apocałitica, parké sto cołaso finansiario?

B. I corsari deła finansa

Le banke no łe se tien el credito de sti mutui in casaforte, ma a łi taja in toketi, łi smisia in te on caldieron co altri toketi de altri mutui, e i łi rivende sul marcà (come fondi de investimento su obligasioni, come roba manco riscioxa). Xe na maniera anca par diversificar el riscio.
Fin cuà, gninte de anormałe. Fè conto de on marcà dove ke se và cronpar na sporta co rento tanti pomi ke vien da pomari difarenti, e te sè ke rento ghe sarà dei pomi smarsi, ma sciao. El costo de sti mutui sbolsi el vien pasà da investitor a investitor, fin ke ora de magnarse el pomo, calkiduni el catà on bao. El problema se ga soło ke pasà, no se ga mia moltiplegà.
Pultropo però in te ła giungla finansiaria i se ga inventà dełe diabołerie ke gnanca ve imaginè. Par exenpio uno el pol torse na asicurasion so na obligasion (o on titoło). El paga on tot mensiłe, ma se sto titoło el perde, ałora ki ke te ga asicurà el ga da ripagarte. Ghe ne xe de tuti i tipi. Sti bàgołi i pol ver anca na utiłità (par rancurarse da risci), ma łe pol anca somejar a scomese da casinò.
Eco ke dei profesionisti deła finansa i ga snasà na oportunità de investir controcorente. I ga fato on gran laoro de riserca. I xe ndà in volta a marcà, rumegando pai pomi pì smarsi (i mutui a pì alto riscio de bancarota, “forclosure”). I ga vosudo cronparse łe sporte co rento pì bai posibiłì. Xérełi dei pori mone? Scoltè cuà, altro ke semi.
I ga investìo i so capitałi par cronparse ste porkerie, e dopo i xe ndà catar el panpe ke ghe łi asicurava. Ma ki? Merryl Lynch, Lehman Brothers e conpagnia beła.
Fose stà na senplice asicurasion saria ndà cusì: “Ciò, Mr. Lynch, a go ki na sporta de pomi ca go pagà 100 franki. Mi te pago 1 skeo al mexe de asicurasion, ma se taco catar bai e xe tuto da trar via ti te me paghi 110 franki. Ok?” El sior Lynch el varda rento ła sporta, el fa i so calcołi e ghe risponde: “Puìto!” Streta de man, e via.
Soło ke no se trata de na asicurasion so na auto, in te ła giungla finansiaria no ghe xe limiti de imaginasion, e invese pultropo ła xe ndà presapoco cusì: “Ciò, Mr. Lynch, a go cuà na beła sporta de pomi, te savési ke boni. No inporta cuanto ca łi go pagà. Mi so disposto a pagarte 1000 al mexe de asicurasion… Però se va tuto smarso te ghè da pagarme 110000…Ciò, miłe franki al mexe i xe tanti, seto.”
Eco ke el problema el se ga moltiplegà. Sti Indiana Jones de Wall Street da milionari i xe deventà miliardari (i cronpava a 100, i scometeva contro, e i intascava 110000). Ma ne xe capità de tuti i cołori. Sto kive no xe altro ke on exenpio ca go łeto su cnbc.com ancora a Febraro 2008 (7 mexi prima del scioco) in te n’articoło ke vantava ła geniałità de on de sti personagi.
Par inposibiłe, parké ntel mondo dove ke vive ła xente normałe uno no asicura mia ła makina sperando de far no scioco, anca parké łe asicurasioni prima de pagarte łe pensa tute. E invese xe sta come asicurar barake in Sud California co on incendio a l’orixonte, e asicurarle tute come ke łe fose viłe de Hollywood stars.
Ma come połi permetar na roba simiłe? Beh, invese de ciamarle “asicurasion” o “scomese” te łe ciami “derivatives”, “futures”, e tute staltre bełe robe dove no se capise cosa ke łe xe però val ła pena cronpar parké me lo ga dito el consulente finansiario .