PLEBISCITO.EU | PNV. Press News Veneto

Tanti i me ga dimandà cosa ke ghe convien far co i skei (ke ghe xe rimasti). Invese de girarghe intorno ve digo sùito el me parere su cosa ke par mi se ga da far, e dopo ve dago na spiegasion cosìta podì vedar se si dacordo o no:

i) Asioni. In sto ultimo mexe i marcà i ga perso in media on 30%. Par ki ke no se ga cavà in tenpo, no credo ke ne valga ła pena de cavarse fora deso. Xe xa sta on cołaso sensa precedenti e in mexo ghe xe xa titołi sotovałutà. No val ła pena portar caxa ste perdite, però no stè gnanca sperar ke ghe sarà on recupero prima de Natałe. E ghe vorà ani prima de riciaparse tuto el 30% perso.

ii) Obligasioni. Kive se ga da star veramente atenti. In sto momento a ve consilio de starghe distante. No stè farve fregar da tasi de interese alti, parké in sto periodo xe na indicasion de on riscio pì ełevà ke no i te daga indrio parte dei skei. Par carità, ghe xe de sicuro in mexo dełe obligasioni vałide, ma no ste mia nar a naxo. Nel dubio, fè manco de torli, e me racomando de darghe n’ocio a cuanto esposti ke i xe i nostri veci co obligasioni del stato talian.

iii) Cash, conti corenti, skei soto el materaso. Par ki ke ga manco de 20miła in te’l conto corente, no ste preocuparve, el bancomat ve funsionarà insteso. Anca se ghe xe ła fiła fora dała banca e i finise i contanti, poki skei in banca i sarà boni de garantirvełi. Anca se ła vostra banca ła fa fałimento, no vol dir ke i sara botega, ma ła vegnarà cronpà da nantra e no ghe sarà gnanca na interusion de servisi.

iv) Fondi de investimento e misioti vari. Cuà gavì da esar cativi. Pensè ke ki ke se ga salvà da sto patatrak xe ki ke se rangia e investe i so skei diretamente. E invese ki ke se afida a intermediari xe ki ke ghe ga tocà restar rento durante ła pexo crixi finansiaria de tuti i tenpi. No xe mia acetabiłe ke sti consulenti finansiari i xe senpre pronti a dirte de cronpar, ma co ke ghe xe da scanpar (e lori ke i xe del mestiere dovaria saverlo suito) no i te dixe gninte. E po’, ki ke ga proà vendar el ga scoverto ke ghe vol giorni par vendar, e adiritura on mexe par farse rivar i skei. On servisio de sto genere no xe perdonabiłe, anca parké ghe xe mestieri, tipo etrade, par rangiarse e cronpar diretamente indici de fondi, obligasioni, monetario, esetara. Mi faso cusì. No ghe sto mia drio la borsa ogni di. Investo a lungo termine, faso al masimo una operasion a l’ano, però co ke ghe xe da scanpar, scanpo. Se ła mandria ła core, convien córar e domandarse el parké dopo. No speto mia na setimana par torme n’apuntamento in banca par scoltar uno ke me ła conta.

Na roba go da xontar però in difexa de sti fondi. Tanti i ga paura ke se fałise ła banca o l’istituto finansiario ke ghe gestise sti investimenti, i perde tuto. Voialtri a si titołari de on fondo de investimento ke a so volta xe titołare de tanti toketi (titołi) de axiende varie. Se ła banca fałise, sti toketi de inprexe i resta comuncue vostri.

In concluxion a ve go dito de starghe distante dałe obligasion (a parte alcune…) e de star fermi e meterseła via co łe perdite de l’asionario. Parké? Me spiaxe ma go da rimandar a na tersa puntata parké ła xe longheta da spiegar puìto. Anca parké se ga da far ciaro so tanta confuxion ke i xe drio far sora el panico deła xente. Tipo smisiar su sta crixi finansiaria co ła crixi economica (ła recesion ke xe drio rivar). Cuanto vołio scométar ke deso i ne dirà ke el federałismo no se pol pi far par via de sta crixi finansiaria e ke deso gavemo tuti da far on sacrificio par ła patria e ła bandiera?

Lodovico Pizzati
PNV

[Link ala prima parte]