PLEBISCITO.EU | PNV. Press News Veneto

Domenega 30 de novenbre se vota a Meduna de Livensa, un picolo comun in provincia de Trevixo, incastonà dal’Italia in un anbito che mete in grosa dificoltà i so abitanti.
Se vota un referendum de autoddeterminasion par far sieliar a Meduna se la preferise star soto la region Veneto, in provincia de Trevixo, o soto la region Friuli-Venesia Giulia, in provincia de Pordenon.
La xente in granda magioransa la starà dala parte del’ovio, overo dala parte de Pordenon (la Venesia), par evidenti raxon anbientai, economiche e culturai.
El Pnv apogia la polasion de Meduna inte la sielta che la farà domenega e no pol esar altrimenti, visto che stemo senpre dala parte del’autodeterminasion, un prinsipio fondante del Pnv, del’indipendensa, el nostro obietivo, e donca el apogia la popolasion de Meduna che domenega la darà n’altro forte segnal del sgretolamento del’Italia, un stato ormai xmarso e no pì in grado de far gnente par evitar la so fine.
I confini che ne gà inposto i taliani dopo la sotomision violenta dela Venetia i xe buxiari e irispetoxi dela nostra storia e dela nostra realtà.
Cusì come che la xe buxiaria na clase dirigente speso inposta e foresta e anca co no la xe inposta servile e col guinsalio roman, come i vari Galan e raprexentanti vari servi dei partiti, bravi solo a cortelarne ale spale a naltri Veneti, par la so conveniensa e par favorir la so cariera politica “romana”, nisuno escluxo.
Par far capir el grado de malafede dela politica taliana verso le popolasion dei comuni de confine, ve tachemo el ricorso prexentà a strasburgo ala Corte Europea dei Diriti del’Omo el 16 de novenbre pasà dai raprexentanti dei comitati referendari de 18 comuni.
Anca se ghe vol un fià de tenpo, lexeve le pagine del documento, parché le ve farà ben capir che chi che ve parla ancora de autonomia e federalixmo al dì de ancuò o el xe ignorante o el xe solo che drio ciaparve pal sesto e no savemo quala ipotexi la sipia la pexo.
E le ve farà anca capir che l’unica strada che resta la xe quela che ghemo tracià naltri del Pnv, el referendum par la nostra indipendensa, che nol gà bixogno de nisuna aprovasion de Roma.

Partito Nasional Veneto

—

Scarica el ricorso contro l’Italia, prexentà dai comitati dei comuni de confine ala Corte dei Diriti del’Omo a Strasburgo