La matina co ca togo el capucin al bar xe l’unico momento ke me toca butar l’ocio so łe prime pagine dei cuotidian taliani. Come xà segnałà in te’l forum del PNV, ghe xe na perpetua canpagna mediatega de difamasion ke ła meritaria na rubrica costante su pnveneto.org.
I veneti i ga senpre da vargognarse, e ancó sto titoło su Il Venezia ne spiega parké: “Il Veneto affamato di elettricità consuma ben il 10% di quella nazionale”, e l’imancabiłe sototitoło “in un anno bruciati 32,7 miliardi di kilowattora”.
Affamati… bruciato… On pòro can ke se lexe sto titoło in sta freda matina de Novenbre piena de nieve, ghe par de védar n’orda barbarica de consumisti veneti ke magna e bruxa tuto cuel ca vede. Gavémo da sentirse in colpa, consumar de manco, scaldarse de manco (a Trevixo anca sensa stùe), parké semo drio bruxar łe risorse nazzzionali. Semo drio far dano ała patria e ała bandiera. Vargognémose.
indipendenza xe stùe inpisà
No faso gnanca tenpo metar el sùcaro ntel capucin ke xà go fato do conti. I veneti i xe 5 miliuni, grosomodo el 10% deła popołasion deła Repubbblica taliana. Insoma, come consumo procapite semo parfetamente in media.
Però sò anca ke el consumo del lètrico vien senpre paragonà al Pil, ała produsion, ała atività economega, parké pai econometristi xe anca na maniera de stimar ła produtività de na economia co ke i dati uficiałi i xe poco atendibiłi.
Ałora digo, se naltri veneti ke produxemo el 20% del Pil talian, consumemo el 10% dełe risorse de energia, a semo anca masa brai. A semo on exenpio de eficensa, de sparagno, de rispeto par łe risorse e ła natura. A semo boni de produr el dopio de staltri, co łe stese risorse de lètrico.
Lodovico Pizzati
If you liked my post, feel free to subscribe to my rss feeds
Firma per il VENETO INDIPENDENTE!
I 120 Dogi della Serenissima Repubblica di Venezia
Iutane, fa na picola donasion!
Veneto è chi il Veneto fa
il pnv su facebook
twitter
Scottish National Party, SNP
BlogoSquare
No go paroe, te me dirissi el jornae par piaxere?
El giornale xe “Il Venezia” xe sti cuotidiani ke da via gratis in volta par bar.
Gaveva da esarghe el link so l’articolo ma se vede ke xe sbrisià.
Xe el cuadratin in fondo in centro soto ENERGIA
http://www.ilvenezia.it/
visto che i veneti i xe’ messi in ca maniera qua’ i siori dello stato talian xei mai andai a vedare soe banche quanto caldo che i ga’? e soe scole i termosifoni che i va di e notte? so i uffici pubblici quanto che i magna ? termosifoni tirai al massimo e corrente elettrica che va anca col sole fora dalla mattina alla sera non xe’ forse uno spreco ? se demo vedare nei palazzi del potere regionae o nazionae la musica la xe’ la stessa chi dovaria dare el bon esempio i xe’ quei che varda el piocio sora l’elefante . Sto giornae de VENESIA xe’ forse gestio dai amici de GALAN ? al vedare si’ soeo xente come questa i parla dei veneti in maniera falsa e disinforma’ .
Desso non so quanti partiti venetisti ghe xe in te la nostra region, ma temo che non la sia na bona roba. I romani dixea: “Divide et impera”, cioè dividi e continua a comandar….., tanto più che i veneti, che se vanta de esserlo, i se divide facilmente fra de lori. Già, ogni veneto el xe un mondo a parte…. “fasso tuto mi, comando mi… ” come pore donete “vamp”. Ricordeve che quando ga vinto Prodi le penultime elession par pochisimi voti, xe sta colpa proprio del partito del PNE (progetto nordest). Ora basta, tuti i partiti venetisti non della lega nord i ga da unirse almanco in te na lista unica e sostenere sempre Berlusconi che, par quanto poco, el xè manco statalista del PD e un po’ pi federalista. s-ciao