PLEBISCITO.EU | PNV. Press News Veneto

De sti tenpi el film preferìo de mi e me fióło de do ani xe WALL-E. Se ło rivardémo senpre insieme. A ne piaxe par diversi motivi, credo.

A mi parké va a l’esensa de cosa ke vol dir esar umàn. In te on futuro lontàn, i òmeni i vive nte na socetà cristałixà: i vive rento dełe navi spasiàłi, òfi e gnanca pì boni de caminar, i xe servìi da robot. Xe tuto parfeto, organixà dała multinasional Buy’n’Large monopołista asołuta, de prodoti, de informasion, e de połitega.

Ła tera xe sta abandonà par via dełe scoase, e soło on robot superstite el sèvita netar su, secondo programa. Dopo secołi de sołitudine, el robot WALL-E, o par programasion o par no so come, el se gà evolùo. El varda łe stełe, el sente ła mancansa de conpagnia.

Gnanca dirlo, WALL-E el se inamora de ła sonda EVA, vegnùa so ła tèra par controłar ła situasion anbientałe tereste. Naturalmente, el fa de tuto par tornar so ła nave spasiałe co EVA.

WALL-E riva in sto formigaro spasial come on virus, on corpo foresto. E come on virus el altera par senpre l’armonia de Buy’n’Large. El vien meso fra i robot “difetoxi” cuei ke, par no se sa come, i xe stranbi: no i se conporta secondo norma, i ga difeti de programasion, dovù al caxo.

Sensa vołerlo, WALL-E el deventa on liberator, stiłe pianeta dełe simie. El deventa el leader de sti robot stranbi. Lu no’l conose łe regołe, e sensa saverlo insegna a staltri a saltar fora dai binari prestabiłìi.

WALL-E riporta ai òmeni l’esensa de l’omanità: ła curioxità pa’l diverso, el caos variopinto dełe miłe posibiłità. Co sotofondo muxicałe da 2001 odisea neło spasio, el capitàn deła nave par ła prima ‘olta el se alsa in pìe. Come on traguardo evołutivo el dixativa l’autopiłota-robot, sinboło del status-quo de Buy’n’Large.

El status-quo contro l’evołusion virałe. Ła perfesion monopołista contro l’inovasion, a volte fruto del puro caxo. L’autopiłota-robot tacà al potere contro l’inevitabiłe canbiamento. Xe propi natura umana nar fora dai binari mentałi inposti da on regime vecio e inmufìo.

Lodovico Pizzati
PNV