PLEBISCITO.EU | PNV. Press News Veneto

Caro amigo del Partito Nasional Veneto,

a vołevo ringrasiar ti e tuti quanti chi che ne xe sta visini par el sostegno che ne gavè dato e che ne gà permeso el miracoło de crear finalmente na proposta połitica ciara e concreta par l’indipendensa veneta.

Come ca savemo ben ormai, sto qua el xe l’unico obietivo posibiłe che se pol otegner, sensa finir inte’l parlamento tałian ndoe che xe sentai soło che arivisti, afaristi e che’l xe e sarà senpre controłà da chi che gà l’intarese de sfrutarne e tegnerne soto scaco par magnar a sbafo a spexe nostre.

El nostro percorso połitico el xe ciaro e direto, sensa bixogno de far conpromesi coi ladri e criminałi połitici tałiani, come ca invese i xe drio far tuti i połitici veneti che miłita in st’altri partiti che vive deła magnarìa romana.

Naltri faremo un referendum par l’indipendensa del Veneto, domandando el consenso par farlo ai sitadini veneti, i sołi paroni del so destin połitico. El consenso ło domandaremo ałe elesion regionai. El percorso połitico, internasionałe, pasifico e democratico, el xe ło steso che xe drio far i Popołi che prima de naltri gà capìo come ca se otien ła libartà. Ła comunità internasional ła gà parò de bixogno che se cree anca na nova clase dirigente che ła sapia cresar e asumarse ła responsabiłità de diventar ła so interlocutrice nel proceso de otenimento del’indipendensa. E par crear na nova clase dirigente, preparada e responsabiłe, a gavemo ancor de pì de bixogno che cresa el Partito Nasional Veneto.

Prima dełe elesion regionai, continuaremo a pareciar ła rete połitica patriotica che scumisiarà a vinsar łe elesion aministrative par far el ben dełe nostre sità che gà senpre manco schei (grasie ai połitici veneti boni da gnente che inpenise i partiti sentai in parlamento a Roma). Crearemo donca liste siviche de ispirasion indipendentista, ndoe che ła situasion ła sarà madura par partesipar.

Łe liste łe xe verte ała partesipasion dei veneti che gà a cuor el ben del so paexe e del so teritorio.

Gavemo sielto de no farse condisionar da potentati, o da intaresi forti. Par sto motivo no ghemo “Santi in Paradixo” e vivemo soło che deła nostra forsa e capasità, consapevołi che soło łe femene e i omeni forti e libari i pol canbiar łe robe e che tute le scorciatoie łe porta al’inferno deła połitica, come ca xe sta par quei che ne gà precedùo.

Par iutarne a esar senpre pì forti e determinanti par el nostro ben e par crear ła vera połitica veneta nel nome del’indipendensa, te domandemo ałora de esar forte e libaro anca ti e de darne fiducia e de contribuir ała nostra rapida cresita co l’iscrision al Partito Nasional Veneto, o col rinovo deła tesera par l’àno sołar 2009.

Te pol farlo in presia, da internet, da qua. Ła quota de iscrision xe soło de 15 € e te pol pagarla on line co carta de credito (con na picoła comision) o co bonifico bancario.

Co l’iscrision te ricevarà ła nova tesera del Pnv, i novi bełisimi adexivi e, par i primi sento che se iscrive, na copia omagio del novo libreto scrito dal nostro presidente, che ringrasiemo par el pensiero:

“Per un Natale Liberale”
Tre saggi di liberalismo classico

a cura di Paolo L. Bernardini

Se dopo te vol iutarne ancora de pì, te pol far na donasion da qua, opur contatarne par iutarne a crear na lista sivica nel to paexe.

Grasie ancora e bòn 2009, in atesa del nostro vero cao de àno, che da tradision casca el primo de marso.

Gianluca Busato
Segretario Partito Nasional Veneto