PLEBISCITO.EU | PNV. Press News Veneto

Sean Penn

El titoło de sto film de Sean Penn xe stà dopià in italian come “condannato a morte”. Leteralmente el titoło vol dir “morto ke camina”, e se riferise a cuel ke siga le guardie co ke vede pasar el condanà verso el patiboło.

Me xe vegnù in mente sta espresion lexendo le opinioni deła stanpa foresta so ła situasion dei conti del stato talian.

Cuotidian finansiari tipo el Financial Times (articoło, articolo) o trasmision de business tipo CNBC (articolo), łe anałixa i conti publici tałiani come na inevitabiłe condana a morte.

Se pol sigar, pianxar, far capriołe, ma łe sorti łe xe invevitabiłi. Sta ki ła xe ła situasion taliana rispeto ai parametri de Maastricht:

Situasion taliana rispeto ai parametri de Maastricht

Tanti i ghe da poca inportansa ai parametri de Maastricht parké i xe dei numari arbitrari. Non na regoła obligatoria, ma on sugerimento.

Ma el punto no xe mia ke se te sfori i te para fora da l’euro, ma se no te ghè i stesi numari de staltri, te te fè małe a xugar soto na połitega monetaria europea.

Sto punto xe ała baxe deła crixi struturałe taliana de sti ultimi diexe ani. Na crixi ke tanti inprenditori (al de fora del xugo de apalti publici e favori) i xe drio sentir so ła so pełe.

O te xughi rento on contenitor bixantìn (sofegà da burocrasia e tase), co na połitega monetaria da terso mondo de svałutasion, par mantegner l’export conpetitivo.

Opure te ghè na moneta forte (tipo l’euro), ma anca na połitega intełigente, co poca burocrasia e presion fiscałe, par incentivar investimenti, el laoro, e mantegnerse conpetitivi nte’l marcà globałe.

Pultropo l’economia veneta ła xe sta sofegà dal pèxo de ste do alternative. Na tenaja co da na parte n’euro forte ke ga sofegà el nostro export, e da staltra on contenitor bixantin: l’Italia.

I anałisti finansiari xe drio vardar sto stato italian ke camina verso el patiboło de insostenibiłità, e no i pol farghe gninte ma dir: “dead man walking.”

Lodovico Pizzati
PNV