PLEBISCITO.EU | PNV. Press News Veneto

El prodoto interno lordo (Pil) talian el va in retromarcia.

Ma par la gerontocrasia no xe mia na tragedia. Tornar a liveli de redito dei ani pasà ghe ricorda i bei tenpi co ke i gavéa manco rughe e pì celule cerebrałi.

Ła seniłità ła xe evidente e ne toca a naltri darghe na man co l’aritmetica. El calo del -2% el xe previsto pa’l 2009, ma par ke no i se renda conto ke anca ntel 2008 ghe xe stà na forte recesion.

Soło tegnendo conto dei dati fin Novenbre ghe xe stà on calo del -0,3%. E i ga fifa de uficiałixar el mexe de Dicenbre. Vol dir ke sémo xà pì poareti del 2007.

Xontandoghe łe previxion de on cało del -2% pa’l 2009, par fine ano femo i ganberi fin ai livèłi de metà 2005. Ma su col morałe… quattro anni fà si stava bene.

E no stè farve cojonar co ła storièła ke xe na crixi internasionałe. Par ła media europea xe prevista na moderata cresita. El problema xe tuto talian, e rełativo a l’Europa xe come se ndasimo indrio de altri do ani.

Ah… come si stava bene nel 2003… e intanto par fine ano xe previsto ke el redito medio talian el sarà pì baso de keło sloveno.

Ma parlar de numari e percentuałi xe on fià masa da Maria Antonieta. Par ki ke ga perso el laoro par colpa de na połitega economica gestìa da na casta de vecéti, se trata de on croło del 100% del proprio redito.

L’Istat ne dixe ke xe dal 1991 ke no se vedéa on cołaso cusì. Lori ne risponde ke se ne manca el pan, de magnar pasticini. Savémo ke scorlon ke i ga ciapà disdòto ani fa. Sta ‘olta semo pronti par l’indipendensa.

I sèvita ripetarse fra de łori ke se ga da ver paura soło de ver masa paura. Se soło l’otimismo podese vegner mixurà rento el Pil …

No stè preocuparve, naltri veneti no gavémo mia fifa parké conosemo ła nostra forsa economica. L’aragosta taliana a furia de trarne tuti indrio ła xe finìa in tecia.

L’acoa ła boje.

Lodovico Pizzati
PNV