PLEBISCITO.EU | PNV. Press News Veneto

Anca se xe na paroła taliana, el termine Ponzi xe intrà ntel bocaułario talian soło de recente. A xe el cognome de on italo-merican ke ntei primi del ‘900 el gà inbastio su na trufa de milioni de dołari a Boston.

A difarensa de ła caena de Sant’Antonio o vari sistemi piramidałi, sto tipo de trufà ła ga on nodo centrałe. De recente el sistema Ponzi ga fato notisia par via de Madoff, el finansiere de New York ke xe stà arestà de recente par na trufa de miliardi de dołari.

El sistema xe pitosto senplice. Te fè finta de investir skei de clienti, ma in realtà te dopari i skei de novi clienti par pagar cuei veci. Te dè dei guadagni al de sora deła media cosita taca rivar pì clienteła. El sistema sciopa parké ghe xe on limite de gonzi ke ghe casca, e el groso dei clienti rimane in braghe de teła.

Dopo l’ultima crixi finansiaria tanti i pensa ke tuto el sistema finansiario el sipia on Ponzi. In efeti łe bołe azionarie łe se baxa su na cresita dełe azioni dovue a novi cronpadori pì ke ai veri guadagni dełe società per azioni.

Però ghe xe da desernir fra veri investimenti e Ponzi. Tirar fora skei par verxar na botega, ke atira na clienteła, ke fa on servisio, ke crea comercio, ke da laoro, ke porta benesere. Sto ki xe on investimento. Tirar for a skei par verxar na dita ke porta inovasion e novi servisi, ke vien premià dal marcà par via de clienti sodisfati, ke fa skei in sta maniera. Sto ki xe on investimento.

El mondo xe pién de boni investimenti, e no se ga da credar ke ste trufe łe exista soło ntel libaro marcà. Anca i stati i ga praticà (e i pratica) sistemi Ponzi. Ghe xe stà na rivolta in Albania ntel 1997 propi parké el governo centrałe el gavéa sponsorixà on clasico sistema Ponzi ke gà trufà do tersi deła popołasion. Anca el presidente deła Colonbia el xe acuxà de ver trufà 4 milioni dei so citadini co on sistema piramidałe.

No stè credar ke xe soło robe da terso mondo (opur no stè credar ke l’Italia no xe terso mondo). Vardè el sistema de pensioni. Te si obligà a darghe skei, e el stato el te asicurà na pension co ke te ghè finio de laorar. Ma come fało? Invèsteło sti skei in maniera onesta (parké ti no te si bon) e dopo te da indrio i guadagni?

Asołutamente no. I skei ke te sotrae dal stipendio li dopara par pagar łe pension dei veci. Co ke te sarè vecio i te pagarà co i skei de i novi contribuenti? Ma sta ki no xeła mia ła definision de on skema Ponzi? Asołutamente si.

Ma ałora parké sta trufa dełe pensioni no ła croła come tuti staltri skemi Ponzi? In teoria parké ła xe na trufa intergenerasional. Mentre Madoff gavea da pagar i so clienti a breve termine, el contribuente no rivede i so skei fin ke no xe pensionà (dopo almanco 30 ani).

In sta maniera el stato el conta de farla franca co on prestito da na generasion a staltra indove poder farghe na cresta. Ghe xe però on problema. Sti sistemi pensionistici obligatori i xe stà escogità ntei ani ’60 co ke ghe xera on boom de popołasion.

Ła generasion dei nostri noni ła xera gran contenta de far partir sto Ponzi intergenerasional (el sistema pensionistego), parké ła generasion sucesiva (cueła dei nostri genitori) ła xera tanto pì popołoxa.

Difati sta trufa intergenerasional ła pol star in pie soło grasie a na cresità deła popołasion. Ła nostra generasion ła xe manco popołoxa de cueła precedente. No semo bastansa par tegner in pie sto sistema e pagarghe ła pension ai nostri veci.

No ghe xe bastansa gonzi, me spiaxe Mr. Ponzi.

Lodovico Pizzati
Pnv