PLEBISCITO.EU | PNV. Press News Veneto

Deficit Primario (DP): ła difarensa anual fra spexa publica (G) e entrate tributarie (T)

DP = G – T

Deficit (D): el deficit primario (DP) pì i interesi (R) pagà sul debito publico.

D = G – T + R

Debito (B): el totałe dei deficit fati ano dopo ano.

o pi senplicemente, el debito ancó xe el debito eredità da l’ano prima pì el buxo (deficit) fato nte l’ano corente.

I interesi (R) ke se paga ancó i dipende dal taso de interese (r) ke se paga sul debito su la gropa (B).

Alora vedemo ke el debito crese in sta maniera ki:

Par sostenibilità fiscałe se intende esar boni de ripagar el debito ke se ga su ła gropa. El debito el vien finansià da sparagnadori ke cronpa Bot e Btp (obligasioni del stato talian), e i xe disposti a inprestarghe skei al stato fin ke i se fida de riaverli indrio.

Ma se el stato talian el xe senpre in roso (el fa senpre deficit) par cosa se fideła ła xente? Parké łe entrate tributarie (T) łe crese a seconda del redito nasional (el famigerato Pil, prodoto interno lordo). Ałora, se l’economia nasional ła crese pì in presia del debito, grosomodo l’indebitamento el xe considerà sostenibiłe.

Xe intuitivo ke se el Pil crese de pì del debito, el raporto debito/Pil el va xo anca se in vałori asołuti el debito no’l cała. Donca se pol parlar de indebitamento sostenibiłe, e ki ke ga Bots no ga da preocuparse.

Par rasicurar i investitori, ma anca par oblighi europei, de tanto in tanto el Ministero del Texoro talian el publica el Programma di Stabilità dell’Italia dove vien spiegà co previxioni baxà su standard europei ke xe tuto a posto. Sto ultimo documento xe del Novenbre 2007 e a p.54 ghe xe on capitoło so ła sostenibiłità del debito.

Ve riporto el grafico de previxion ke i ga fato pa’l debito publico. Fin on ano fa’ i prevedeva ke el debito/Pil całava da 104% a 95% entro el 2011. Dopo, grasie a na cresita de l’economia in media del 1,7%, e on baso taso de interese sul debito del 3%, entro el 2021 el debito talian rivava soto el 60%, rientrando ntei parametri de Maastricht.

previxion pa’l debito publico

Invese el debito Pil xe esploxo da 104% a 112%, ła cresità xe stà negativa del 1% ntel 2008 e xe previsto on cało del 2% ntel 2009. I interesi sul debito i xe pitosto alti al 4.5%.

A Febraro 2009, dei macroeconomisti taliani i taca parlar de rischio paese e de default del debito (vedi articoło). I sostien ke se l’Italia no ła crese de almanco 1,5% ogni ano, no ghe ła fa.

Da Febraro ła situasion ła xe ndà in pexo. IlSole24Ore riporta ke el debito talian in vałori asołuti el xe rivà a 1708 miliardi de euro. Ke łe entrate tributarie (el T de prima) el xe całà del 7,2% ntei primi do mexi del 2009. Sincoe miliardi de manco de l’ano pasà pa’l bimestre (30 miliardi de manco par tuto el 2009?). Ste ultime cifre fa senbrar łe previxion de l’OCSE de on deficit del 5-6% tanto otimistike.

Tornando ała sostenibiłità del debito, gavémo i interesi na volta e mexa pì alti del previsto (4,5% invese del 3%), on G (spexa publica) esploxiva (casa integrasion, teremoti, poitici eternamente magnoni), on T (entrate tributarie) ke xe drio atrofixarse (-7,2%!!).

Par conpletar sto bel cuadreto, pararia ke el governo no ga gnanca i skei pai teremotà. I tira fora proposte (ła tasa sui riki, nantro 5×1000) ke al masimo te tira fora a poki sentenari de milioni, co ke semo drio parlar de buxi da diexene de miliardi par mantegner na aparensa de sostenibiłità de on debito ormai de do milioni de milioni de euri.

Lodovico Pizzati
Pnv