Santa Pasiensa

santa-pasiensa

Stasera dopo magnà xe stà una dełe rarisime volte ca go proà parlar de połitega co me mojere.

Dopo óndaxe ani ke vivemo insieme e ke ła me vede batajar par ła cauxa veneta, ła me dimanda: “Ma no crédito ke formàndose pì stati se crea on pericoło par ła paxe ntel mondo?”

Me xe petà xo ła sbésoła sora ła tòła parké dopo ani ke martèło co dati ała man, sostenendo ke xe propi el contrario, me riva doso stà banałità ke me fa nar ła sena par traverso.

Caxomai xe i grandi stati otocenteski, proibisionisti e guerafondai, ke i gà come obietivo espansioni teritoriałi. Invese i stati pì cèi par prosperar i gà bixogno de apertura comerciałe, paxe e stabiłità. Ne gavémo parlà anca masa: kive, live e anca qui, quo e qua.

Par no parlar dei studi academici co tanto de rixultà econometrici ke sostien na corełasion fra moltiplicasion de stati, globałixasion e benesere.

Ma anca vardandose intorno co on poco de bonsenso xe intuitivo ke Lituania, Letonia, Estonia, Rep. Ceca, Slovakia, Slovenia (tuti stati nati ntei ultimi 20 ani) no i subirà pì łe goere cauxà dai inperi rusi, austro-ongarici, dhermaneghi, e otomani.

Par no parlar de tute łe goere ke ne gà fato far l’Italia: me nono ne gà fate 5 (sìncoe).

Ve scrivo sto artìcoło parké deso ke el Pnv el gavarà na scianta pì espoxision se moltiplicarà el numaro de persone ke de fronte al conceto de independensa łe cascarà dałe nuvołe.

Gavémo da armarse de santa pasiensa e scominsiar senpre da cao par smontar el bonbardamento de loghi comuni ke ne rivarà doso.

Ommm.

Lodovico Pizzati
Pnv

PS. Co me mojere no go fato tenpo a ribatere ke ła xe scanpà via par téndar i boce.

If you liked my post, feel free to subscribe to my rss feeds