PLEBISCITO.EU | PNV. Press News Veneto

Jeri l’altro l’Istat el ga prexentà sto raporto sui conti publici taliani. I cuotidiani no i ga posùo far de manco de dar l’alarme roso par via del deficit al 9,3% pa’l primo trimestre 2009.

In realtà sto dato el xe anca masa poxitivo (pai taliani) e vol dir ke el governo talian el xe drio darse da far. Difati el dato el ga da esar paragonà ai altri primi trimestri, parké i conti publici taliani (come el Pil) i ga tanta stagionalità.

Al contrario de le statistike anuali, i dati trimestrali i varia de tanto parké sia i introiti fiscali ke le spexe no łe xe mia guałive par ogni stagion.

Sta kive ła xe na media dei dati trimestrali de sto ultimo decenio (in % al Pil):

E sti ki invese i xe i dati del primo trimestre 2009 (in % al Pil):

Paragonando i dati del primo trimestre 2009 (i mexi de xenaro, febraro e marso) co la media stagionale se vede ke sti numari no i xe gnanca małe.

Łe entrate łe xe rimaste in media (39.9% del Pil rispeto a na media del 39.1%). Łe xe adiritura aumentà parké mentre el Pil el xe całà del -5,9%, łe inposte direte e indirete łe xe całà “soło” del -4.5%-5%.

Łe uscite invese łe xe aumentà “solo” de on 3% (49.2% del Pil rispeto ała media de 46.2%). Co on Pil in cało del 6% (rispeto al primo trimestre de l’ano pasà), vol dir ke el governo el xe stà bon de diminuir łe spexe de presapoco on 3% del Pil.

In realtà łe spexe publike no łe diminuise MAI, e anca sto trimestre łe xe aumentà de 8 milioni de euri (180 milioni primo trimestre 2009, rispeto a 172 milioni del primo trimestre 2008). Ma tegnendo conto de l’inflasion e stagionalità, łe xe stà gran contegnùe.

Par na volta, bravo el governo talian, ke xe stà bon de contegner el deficit trimestrałe a soło el -9,3%.

El vero test vegnarà a Setenbre, co ke vien fora i dati par el secondo trimestre. Live se xugarà el default del contenitor talian.

Lodovico Pizzati – Pnv