PLEBISCITO.EU | PNV. Press News Veneto

Anca ancó ła Feriveci Italiana Autoscontri Torino (FIAT) ła gà mendicà na fraca de skei al Stato Talian.

L’aministrador dełegà Marchionne el prevede on cało de vendite del 20% rispeto al 2007. Pa’l 2010 almanco 1 milion de vendite in manco.

Par na dita ke sensa susidi statałi ła sarìa ndà in fałimento ancora ntei ani ’70-’80, l’efeto de sta crixi globałe raprexenta el colpo de grasia.

Grasie ała bancarota dełe case statałi, sto zombie de l’automobiłismo mondial el vegnarà finalmente sepolto.

Prima de pianxer pa’l mondo del laoro piemontexe, pensè a l’ingiustisia, a l’imorałità, a ła mancansa d’etica ke l’unità d’Italia ła gà portà al mondo de laoro veneto.

Par deceni łe risorse fiscałi venete łe xe stà ciucià sù par ingrasar na industria parasita, mantegnùa da màndołe e favori połitici.

In sto ano de crixi, sta malvagia perversion tricołore ła xe stà ncora pì lanpante. Mejara de dite venete łe xe ndà in crixi, parando caxa operai, vendendo makinari, sarando botega, anca parké el consociativo sistema bancario talian no tirava fora skei.

Intanto el stato se preocupava de butar (i nostri) skei sui feriveci de Torino. E perseverà a skisarne, fin l’ultima giosa.

L’exasperasion ormai ła se sente anca dai nostri industriałi, e l’aministrador dełegà deła Coin, Stefano Beraldo, el minacia no siopero fiscal.

Invese de lagnarse, e domandar col capeło in man ła bontà italiana, i nostri inprenditori i gà da investire su l’indipendensa veneta.

No soło pa’l ben dełe nostre atuałi medie-piciołe inprexe, ma anca pa’l sviłupo dełe nostre future industrie.

L’industria automobiłistega ła xe drio rivołusionarse. El futuro xe nel letrico, e col letrico se cava via motori, carburatori, ojo, e na fraca de tenołogia onta del ‘900.

I esperti del setore i sà par certo ke co ła senplificasion dełe automobiłi l’industria deventerà pì conpetitiva. Basta grande industria co stabiłimenti imensi. Łe makine vegnarà fora da inprexe de medie dimension speciałixà su cuałità, eficensa e tenołogia, e no su mase de operai e grandi capitałi.

Naltri veneti gavemo dimostrà de ecèłere su sto tipo de industria baxà sul ingenio e na strutura a dimension d’omo.

Ma come popoło cołonixà semo drio ałimentar el vecio e perdente conceto industriałe de naltra epoca.

Destrighémose da sti feriveci. Soło co no stato indipendente podarà fiorir na rafica de makine made in Venetia: a poco costo e rispetoxe de l’anbiente.

Sensa el sofego fiscałe talian, e coi incentivi veneti par l’inovasion, gavaremo on futuro variopinto de caxe automobiłisteghe venete.

Lodovico Pizzati
Pnv