PLEBISCITO.EU | PNV. Press News Veneto

Come tuti voialtri anca mi a go stanpà na serie de copie de Veneto è chi Veneto fà, e a go tacà darle in volta a tute kełe persone ke łe se vargogna de esar venete.

Ne toca stanparle parké ghe xe na forte corełasion fra self-hating venets e alergia a internet. In caxi estremi i xe boni de stanparse anca na e-mail prima de lèxarla.

Par forsa el groso dełe copie me ga tocà distribuirlo a persone de na certa età (no me vien da ciamarli “veci” parkè sta generasion ła xe tanto ativa anca dopo i setanta – no ghe xe pì i veci de na volta…).

No soło i xe ativi, ma i va subito al sodo. Na siora, sensa gnanca tacar lexarlo, ła me ga subito dimandà: “E łe pensioni?”

E mi: “Beh, łe pensioni łe radopiarà, come minimo.” Me pareva na dedusion pitosto ełementare ke no ocoreva anpliarla. Aritmetica fiscałe: ła difarensa fra tase e servisi (pensioni, sanità,…) prima e dopo l’indipendensa.

E eła: “Te credi ti”

E mi: “Ma scuxa, el novo stato veneto se ciaparà in responsabiłità i propi citadini, i propi pensionà.  Te fidito manco de na aministrasion veneta pitosto de una taliana?”

E eła: “No xe cueło. Ma se se stakemo, credito ke el stato italian el moła łe pensioni venete? No łe mołarà mai. No te ghè idea de me marìo cuanti skei ke ga versà in sincuant’ani de laoro. No te ghè idea.”

E mi: “Ma se rivemo a l’indipendensa parké vuto ke el stato talian el se tegna on debito enorme ke el ga verso i contribuenti veneti…”

Insoma, semo ndà vanti do minuti boni a no capirse. E finalmente a go capio. Ela ła credeva ke tuti i versamenti par ła pension ke eła e so mario i gavea fato in te na vita de sudore, in fose tuti rento in te na casaforte xo a Roma.

A so tenpo i ghe gavarà contà ke ghe detrae skei dała busta paga par tegnerghełi par ła pension. Par farghe on favor. Par fortuna ke ghe xe el stato talian ke sparagna par ti, se no ti, pora veneta, no te fè muxina par co ke te si vecia.

Se vede ke sto conceto el se gà cristałixà in te ła psike de tanti pensionà, e i crede (inconsiamente magari), ke ghe sipia on gran depoxito in kalke gran banca xo a Roma co rento tuto el fruto del so laoro.

Ałora soto sta otica, capiso parké ła se sente sciavixà da l’Italia. Ła crede ke a Roma i gapia i so skei in ostagio. No te poi mia scanpar via, cara mia, se no i to skeéti no te łi rivedi pì.

Ła realtà xe, e gavemo da spiegarlo ai nostri cari co tanta pasiensa, ke tuti i contributi versà in te na vita de laoro i se li gà xa magnà fora tanto tenpo fà. No xe na supoxision, ła xe ła verità ała luce del sołe.

El sistema pensionistego talian paga łe pensioni ai veci co i contributi dei xóvani paga-tase de ancó. Ai laoratori de deso i ghe promete ła pension contando so na nova generasion de oki ke pagarà futuri contributi.

El xe on sistema Ponzi intergenerasional.

Donca, l’unico patrimonio ke i ga da tegnerse caro i nostri pensionà veneti, a xe i propri fiói, i laoratori-contribuenti veneti. Xe sti ki ke i te pagarà łe to pensioni, no el Ministero dełe Trufe talian.

E ricordève, cari veci veneti, ke al momento ve riva na pension da poco parké i vostri fiói i xe drio contribuir par pagarghe ła pension a tuti i veci taliani. Co l’indipendensa i contribuirà soło par ła vostra pension.

Xe par cuesto ke łe pensioni de no stato veneto indipendente łe sarà come minimo el dopio de deso.

Lodovico Pizzati

PNV