PLEBISCITO.EU | PNV. Press News Veneto

Un gran comunicator – pagà da Roma – nol sbalia serte robe a caxo

Bon, el menestro tałian del’agricoltura el gà afermà inte na intervista al Gaxetin che el Veneto nol xe mia na łengoa, parkè ghe manca na gramadega. No vołemo cuà pronunsarse sul merito de sta fraxe, anca parkè ghe ło łasemo far vołentieri a altri che i fa el mestier de łengoisti e ke no xe né tałiani né veneti, cusì da ver un ponto de vista neutral. Vołemo invese vardar altri aspeti de sta bruta bruta storia.
Sì, parkè deso cualcheduni del’entourage del menestro coe scarpe onte de tera el xe drio dir che “l’intervista xe sta fata de presia, al tełefono” e “che i ghe gà estorto na fraxe che nol vołeva dir”.
Beh, ste robe podarìa anca capitar, ma no me par proprio che łe posa capitar el forse mejo comunicador che ghe sipia da ste parti. No, no xe rispetoxo nei so confronti dir che el vołeva dir n’altra roba. Lu el vołeva dir proprio cuesto, chel veneto nol xe na łengoa.
Dopo podemo sercar de capir A CHI chel dovea dirgheło. Parkè i połitisi in general i gà un visieto, chel xe cueło de mandarghe a dir łe robe a cualcuni in modo indireto.
Na pratega un fià bruta, che no apartien tanto ai veneti par dirla tuta. Sti cuà i pararìa pì conportamenti da mafioxi che da veneti.
A chi gało mandà el mesagio el menestro tałian?
Łe ipotexi łe xe pì de una. Mi ghe ne vedo do sora de tuto. El podarìa verlo mandà ai so aleati del pdl, par dirghe che – in fin dei conti – łu el xe tałian e chel podarìa esar un bon goernator del Veneto, na persona afidabiłe insoma par tegnerne soto el taco tałian. N’altra posibiłità ła xe che l’omo el gapie mandà un avertimento ai tanti venetisti che lo tien (o ło tenieva) in palma de man come defensor del’identità veneta. Par dirghe che no basta un suporto senplice, ma che’l gà da esar adorà come l’inperador Adriano e co’l gà da ndar su un palco (come par exenpio ała Festa dei Veneti a Sitadeła), nisuni gà da oporse.
Bon, cuel che xe grave xe parò che co sta senpiada el sior Luca Zaia el gà xogà co na cuestion crucial del’identità nasional veneta. Da ieri l’amor del mondo veneto nei so confronti el se gà incrinà in modo grave. Deso, al masimo, el podarà esar un matrimonio de intaresi e niente de pì. E no co n’altri, se intende.

Gianluca Busato
Segretario PNV