PLEBISCITO.EU | PNV. Press News Veneto

Par tuti i genitori ke in sti giorni i xe drio tribołar par mandar i putèi scoła, no stè preocuparve, na volta indipendenti femo mejo.

Par fortuna ke łe nostre maestre, i nostri dirigenti scołasteghi, łe nostre cartołerie, i fa no sforso par destrigarse in mexo a sto labirinto de dixeducasion itałica.

Ancó vò in te na cartołeria dove ke me ricordavo ke i vendeva testi, par vedar de tor na scianta de libri par me fioło. L’ometo me spiega ke tute łe cartołerie no łe vende pì testi, parké ghe toca anticipar, e dopo el stato xe anca bon de no pagarte.

Me xero desmentegà de sto monopołio statałe sui testi scołasteghi. Deso ghe xe anca on monopołio de distribusion, e par Venesia ghe xe soło ke na libreria ke ga testi par tute łe medie e superiori.

Vò co me fioło in sta libreria co ła lista de libri, pago n’aconto de 65 franki, e i me dixe ke deso me toca spetar na setimana ke li ordina (dopo el costo totałe va sora i 200 franki). El me spiega ke xe normałe ke ła prima setimana de scoła nisuni ga i libri, parké no i pol miga risciar de antisipar libri co ke łe scołe łe sevita far canbiamenti fin l’ultimo.

Co łe librerie universitarie xe anca pexo. St’ano pasà ordino do mexi in anticipo on testo novo pa’l me corso. Tacà insegnar a ghe domando a i me studenti se i ga el testo. No i gavéa gnanca łe fotocopie parké sto testo no ghe xera gnanca in bibioteca (ghe credo, el xera novo…).

Torno da l’ometo deła libreria universitaria e me spiega ke gnanca ło gà ordinà ke tanto i cata tuti na maniera de farse łe fotocopie e cusita i sparagna co łe ordinasion. Me ga tocà farghe far łe fotocopie del me testo ała portineria.

Łe ineficense del sistema ITA se vede da ste picołe coxe, ma naltri veneti se meritemo de mejo. Na volta indipendenti, eco come ke riformaremo el sistema scołastego:

1. Intanto ła decixion de insegnamento ła sarà decentrałixà. No gavemo mia bixogno de diktat ministeriałi, parké łe nostre maestre łe xe pì parecià dei burocrati romani.

2. Ogni maestra ła pol sernir el testo ke ła vołe, in sta maniera no sarà mia soło el nevodismo deła nomenclatura romana a ciuciarse na cucagna de ordenasion. Conpetision fra testi, e el mejo libro el gavarà el pì gran suceso.

3. Basta co ste cartełe ke ne scoraja ła skena de i nostri fioi co testi pexanti e ingonbranti. Semo ntel 21esimo secoło, e co manco de 50 franki (vołendo sponsorixà anca dała scoła) podemo darghe on ebook par ogni scołaro. Rento live ghe stà tuti i testi de sto mondo co maniera de scrivarghe par sora faxendo apunti digitałi coi novi touch screen.

4. Co sti libri ełetronici se fa: i) on favor a l’anbiente mołandoghe de segar xo albari; ii) se fa on favor al tacuìn dei genitori; e iii) se dà ła posibiłità ałe maestre de conpor i propi testi a seconda dełe proprie exigense evitando costi editoriałi.

In te na Venetia indipendente no gavarà pì senso ver on sistema scołastego centrałixà. El centrałismo xe n’arogansa de nantra epoca dove łe elite de capitałi distanti łe saveva lore cosa isegnar ała prołe de mase de contadini ignoranti.

Ancó i genitori veneti i ga na media de intełigensa e de titołi de studio de tanto superiori ai burocrati romani ke ncora decide cosa insegnar ai nostri fioi. Xe ora de darghe on tajo.

Nte ła Republica Veneta ogni distreto scołastego el pol deventar na sorta de cooperativa dove ki ke comanda (come soci) i xe i genitori, ke i pol vegner coinvolti in tute łe decixioni sensa spetar permesi da Roma.

Xe inutiłe dir ke in sto sistema pì eficente e manco costoxo łe nostre maestre e profesori de medie e superiori łe vegnarà pagà na fraca de pì, e ghe vegnarà trategnù tanto manco tase.

Sto ki sarà el sistema scołastego dove ła scoła sarà on posto sereno par l’educasion dei nostri fioi, co on personałe contento e apresà (nte ła busta paga). Sarà ła fabrica ke sfornarà łe menti par ła nostra rinasita culturałe, e ła materia prima par łe nostre industrie d’avanguardia baxà su ła ricerca e l’inovasion.

Lodovico Pizzati

Pnv