PLEBISCITO.EU | PNV. Press News Veneto

In ste ultime setimane na serie de vargognosi atachi i xe stà mirà verso libari citadini de no stato sovrano.

Primo, l’indipendenza dele banche svizere l’è stà ciapà pa’l colo da no sforzo organizà fra grandi nazioni-stato. Paesi masa grandi, che no i xe boni de dar libartà adeguà a i so suditi, i gà proà sofegar le libartà dei citadini svizeri. I xe drio obligar i svizeri a rinunciar al so paradiso fiscale invese de riformar i so inferni fiscali.

Secondo, el ditator de un paese nord afregan el ga fato la vargognosa proposta de divider la Svizera fra Italia, Francia e Germania. El sior Ghedafi pena che’l poe el ne ricorda de la lota libica contro el colonizator talian. No’l dovaria mia augurar la stesa malasorte ai svizeri.

Invese, Ghedafi el dovaria capir che ghe xe altre nazioni che le xe stà vitime del colonialismo talian. I veneti i xe stà anesi solo pochi deceni prima dei libici, e semo ncora drio suar par la nostra indipendenza. I veneti i ga na nazion che se distingue par la so storia, la so lingua e la so cultura, e che i se merita de ritrovar la so dignità.

A xe par sta ragion che el Partito Nasional Veneto (PNV) l’esprime tuta la so solidarietà verso i citadini svizeri. Parché in te n’epoca quando el primo ministro talian el xe el novo mejor amigo del ditator libico, a ga da senbrar che el Nord Afrega el xe pena rivà rente i so confini alpini.

I veneti i vol far saver ai svizeri che no la xe mia cussì. Podì anca esser circondà da ostili nazioni-stato, nostalgiche de na epoca co che l’aroganza la sofegava le libartà individuali e che ga dà a l’Europa tante guere. Ma la xente rento quei confini la xe dala vostra parte.

Noaltri amiremo la libartà e benesere che gavì guadagnà, e ve ciapemo da esenpio intanto che aspiremo a no stato indipendente dove le libartà dei citadini le vien prima de tuto.

Filipo Dal Lago
PNV