PLEBISCITO.EU | PNV. Press News Veneto

No so cosa ghin pensè voialtri, a lo gavarè visto tuti el sior Enzo Rivellini all’Europarlamento ieri ke parlava in napoletan.

Mi me son comoso.

Finalmente, a ghe go dito a lo skermo del me conpiuter. Finalmente.

No solo parkè me piaxe e me gà senpre piasso el napoletan come lingua, no parlo de De Filipo e Totò, parlo de la so poesia e de la creatività de sta lingua bona de mostrar senpre l’ironia de la so gente. Me gà piasso come ke Rivellini gà motivà el so intervento:

“El napoletàn – el ga dito – el xe na lingua. El ga na gramatica, na leteratura e el veniva usà in te le Corti de Europa. No xe on senplice dialeto.”

Bravo, applausi. A lo gavaria baxà su le ganase, come ke i fa i napoletani, varda. Così te me piaxi, consio de la to vera lingua, fradeo napoletan.

Infati, se vardè l’intervento in video su Internet ve rendì conto ke koando ke parla taglian no xe mia se steso. Koando parla napoletan te vedi l’omo vero, ke parla la so lingua, con piasere, a so agio: indosa el vestito giusto.

Dopo el sindaco sicilian ke ga butà xo la scrita de Piasa Garibaldi a martelà, eco un napoletan ke ghe spiega al mondo cosa ke xe drio sucedare tra i tagliani. No xe storie de rasismi e de discriminasion come ke ve conta certi partiti verdi de rabia par tirar su voti de gente straca e frustrà de esare sotoposta a una union de cartapesta. Xe storia de la vera realtà de koel ke te sì par davero.

Ma tuto koesto xè ne l’interese de la gente de la penisola itagliana, seo ciaro? No xe koestion de egoismi.

Un amico sardo in t’un canpo venexian do setimane fa, ko ghe spiegavo parkè l’Indipendensa ghe convien a tuti, me dixeva la solita frase: e la solidarietà al sud? Ma i lo sa tuti ormai ke l’asistensa xe la causa primaria del crimine organisà al sud! Vanti dei. L’unica forma de solidarietà xe de molarghe. Lo dixemo da senpre. Lo dixe anka i esponenti de la Confindustria del Meridione: basta asistensialismo, xe drio copare Canpania, Sicilia, Calabria, Puglia, Basilicata. El xè sta zito on momento, e dopo el me gà da rason. Inevitabie.

Ma el punto xe un altro e tende a contradir la infausta frase ke i ne ga costreto a inparare a memoria nea scola tagliana: “Fatta l’Itaglia gavemo da far i tagliani!” Mi digo ke i tagliani, beli e indipendenti ne le so nasion vere – La Repubblica Serenisima, el Granducato, el Regno de le do Sicilie – i xera già beli ke fati, x’è l’Italia l’invension snaturata e malsana ke ne gà rovinà la vita a noialtri fino ai nostri bisnoni.

Scuseme, no lo digo mi, in verità, lo dixe e lo gà scrito Jacob Burckhardt in La civiltà del Rinascimento in Italia.

“L’italiano del Rinascimento”, el scriveva el famoso storico, xè stà “el primogenito dei fióli dell’Europa moderna”.

Vardè l’analisi de Burkhardt ke fa Eric Fromm in Fuga da la Libertà. Parla da sola:

“El fato che la società medievale la se gapia disgregà in Italia, prima che ne l’Europa centrale o ocidentale, dipende da taluni fatori economici e politici. Fra koesti ghe xera la posizion geografica de l’Italia e i vantagi comerciali che ne deriva, in te un periodo in cui el Mediteraneo el xera la gran via comerciale de l’Europa; la lota fra el Papa e l’Inperator, che gaveva dà luogo a un gran numaro de unità politiche indipendenti; la vicinansa a l’Oriente, che ga parmeso de introdur in Italia talune teniche inportanti par el svilupo de certe industrie,- come koela, par esenpio, de la seta – tanto prima che in altre parti d’Europa.

Da koeste a altre condisioni a xera sorta in Italia na potente clase danarosa, i cui menbri i xera pien de spirito de inisiativa, de volontà de potere, de anbision. Le stratificasioni de clase feudali le xe deventà manco inportanti […] El risultà de sta progresiva distrusion de la strutura sociale medievale a xe stà la conparsa de l’individuo nel senso moderno dela parola”.

Burckhardt lo dixe ciaro:

“Sto velo (de fede, ilusion e pregiudizi infantili) a xe svanio daprima in Italia; a xe deventà posibile considerar e tratar el Stato e, in genere tute le robe terene, da un punto de vista ogetivo; ma al tenpo steso se sveja potente ne l’Italian el sentimento sogetivo: l’omo se trasforma ne l’individuo spiritual, e come tale el se aferma”.

Non par gnente xè koa ke se forma el capitalismo e l’individuo moderno. Ma GRASIE a l’esistenza de on gran numero de unità politiche indipendenti. Con la libera concorensa i abitanti de sta penisola i da el meglio, con l’asistensilismo e la s-ciavitù i tira fora el pexo.

El Rinasimento xè sta l’unico periodo nel koal i diversi stati a sud de le Alpi i xe sta boni de dare tanto al mondo: inutile l’elenco, vardeve intorno, e in te i libri de storia, arte, siensa.

Fradei europei, fradei mericani, cinesi, africani e indiani, da ste parti, a xe così, liberi de esprimere le nostre rikese culturali, le nostre bele diferense, demo tuto, rendendo florido el comercio, serena (da noialtri serenisima) la società. Costreti come s-ciavi de un re francese prima, de un ditator bolognese dopo e de na marmaglia bizantina fino ai incantatori del popolo de ancò (vedi de novo Fromm sul “protetor magico” e el “conformismo da automi”) a finemo come ke semo finii: insemenii, straki e senpre pi poveri.

Benjamin, me dispiase par ti, ma da ste parti: divided we stand, united we fall!

And fast.

Iamme iamme iamme ia, l’indipendenza a da turnà.

Gustavo Dal Lago