PLEBISCITO.EU | PNV. Press News Veneto

Ocio ke i taliani i xe gran ricopiatori de notisie. Gavìo prexente come ke dałe volte i fa védar al TG ke a Chicago d’istà ghe xe na gran afa? O ke a New York d’inverno fa tanto fredo? O par pigrisia o parké ghe fa comodo i giornałisti taliani no i fa altro ke ricopiar notisie da altri stati. Par sta raxon vien fora roba poco rilevante.

Nel caxo de informasion economega ghe xe anca el riscio de dixinformasion. Da sta istà i sèvita martełar ke el pèxo xe pasà e ke l’economia a xe drio riciapar fià. Xe fora de dubio ke sta ki xe ła tendensa a liveło global.

Barry Eichengreen, famoxo economista de Berkley, el ga paragonà sta crixi del 2008 co ła gran depresion del 1929. In sto grafico a ne fa vedar come ke fin deso el cało de produsion mondiałe el xe stà parałelo al tonfo del 1929. Parlemo de perdita percentuałe (ase verticałe) nte l’arco de mexi sucesivi ała crixi (ase orixontałe).

Xe ciaro ke mentre ntel 1929 ła crixi ła ga durà par tri ani, ancó pararia ke el mondo a xe drio cavarseła dopo presapoco 1 ano de recesion. Sta ki xe ła notisia divulgà dai mass media mericani, e sta ki xe cuel ke ne dixe i papagałi de tełegiornai taliani.

Eichengreen (insieme co nantro economista, Kevin O’Rourke) però el xe ndà a anałixar a fondo co sto articoło. I ga fato el steso paragon pai stati singołi. Come xeła drio ndare l’Italia dal 2008, rispeto ała gran depresion del 1929?

In 1 ano el stato italian ne ga fato far on tonfo pì grando de 4 ani de depresion (48 mexi) dal 1929 al 1933. Semo drio parlar de cało de produsion industriałe. Produsion ke par grosa parte ła xe veneta. Gavémo da riciapar in man ła nostra economia parké semo in balia de inconpetenti.

Lodovico Pizzati
PNV