PLEBISCITO.EU | PNV. Press News Veneto

(A proposito de “I Edredoni” de Nerio de Carlo)

Un etologo gà racontà int ‘un articolo de giornae, cosa ke xè drio capitare ala fauna de le regioni del Po.
Mentre xero drio lexare, no gero mia bon de cavarme via da l’imaginasion ‘na maledeta metafora ke continuava saltarme ai oci.

L’etologo Danilo Mainardi (autore de la famosa frase: “l’ecologia a ne insegna ke la nostra patria xè el mondo”) gà spiegà i pericoli ke presenta a un ecosistema l’introdusion fora controlo e indiscriminà de specie esotike, nel senso de specie ke xe cresù fora da sto ecosistema.

El punto no xè certo ke no ghe xe spasio par specie foreste, ma ke se ste specie le gà la posibilità, esendo abituà a l’adatamento in ecosistemi estranei, le “invade el canpo” e le se inpone, coi propri sistemi, e copa via tuti i altri. Par natura.

Nel Po e in altri fiumi itagliani, fin zo in Toscana, par el momento, xe senpre pi presenti pessi lunghi fino a 5 metri e ke pesa 400 chili: se trata del pesse siluro, deto anka “el cocodrilo del Po”. Xè pessi originai del Danubio, inportà da koalke alevatore iresponsabile. Ghi n’è scapà fora koalke d’uno in tei fiumi, e i se ga moltiplikà, skisando via le speci autoctone. Insoma, i se magna fora tuto.

Da l’America Latina (Cile, Paraguay) xè rivà invesse le nutrie, bele pantegane pelose simili a marmote ke pesa fin 11 chili. Fin koalke ano fa andava tanto de moda la pelicia de castorin, ke altro no xera ke sti pori sorse cresù a dismisura, ingrasa e curà ben in te i alevamenti, copà e spelà. Anka ‘ste nutrie koalke d’un ga da verle liberà in tel sistema ecologico e deso te le vedi noare anka xo pal Tevere a Roma. No digo ke le sia numerose come picioni, ma insoma, ti ghin vedi pi ke te vedi sorse o pantegane. I unici boni de magnarsele, ko le xe ancora zovani, xe le volpi…

Koalo xe el problema? Koalo xe el problema del piranha rosso ke a agosto de ‘sto ano xè sta pescà sul Po? De la rana toro americana, de le vongole filipine ke le xe drio distrugere le vongole locali? Del coleottero cerambice rivà da la Cina ke xe drio magnarse i boschi in Lonbardia e Veneto? De l’alianto, pianta infestante ke crese dapertuto? Del tartufo cinese ke nol sa de niente, ma xe drio distrusare koelo de Alba? Del gambaro americano de la Louisiana scapà via da koalke acquacultura nei ani ‘70? Lo scoiatolo grigio merican? La tartaruga mericana? La famosa zanzara tigre?
Pararia nesuno, tanto “l’ecologia a ne insegna ke la nostra patria xè el mondo”, no Danilo?

E invese pararìa, come dixe lo steso Mainardi, ke l’intervento de l’omo, pai so calcoli indiscriminà e el so conportamento poco informà de koel ke ghe sucede a l’anbiente circostante, contribuisa a la sconparsa de le specie ke xe cresù nei secoli dentro un ecosistema. Goodbye, biodiversity!

Insoma, xè in ato na forma de colonixasion da parte de le specie “singane”.

E no ghe saria nisun problema visto che “l’ecologia la ne insegna…” bla bla bla, ma in realtà el problema de creare un caos dove ke tuti i animai i vive pegio, dove ke ghe xè manco diversità e dove ke el sistema ris-cia de inpoverirse,(risorse rike magnà fora e dopo abandonà da ste specie colonisatirci) la ghe xe ecome…

Ve serve ke ve ‘iuto a capire la metafora de na cultura (ecologica o meno) ke la se lasa colonisare par 150 ani da pesci siluri e nutrie? E dopo la se lasa metar rente de tuto e de pì?

No xe koestion de intoleransa: l’ospitalità, l’integrasion, l’apertura le xe parti integranti de la storia veneta, le xè parte del segreto del suceso de sta cultura nei secoli. La biodiversità umana la se basa su la rikesa del confronto…

Ma la colonisasiòn, el farse metar soto del tuto, sensa pianificasion, sensa legi vere, sensa inteligensa…la se la riceta sicura par far deventare i nostri boschi, montagne, pianure, i nostri canpi fecondi de agricoltura e de industria on deserto dove ke no cresce pì gnanca la sabia… e no son pì drio parlare de zoologia…

Gustavo Dal Lago