PLEBISCITO.EU | PNV. Press News Veneto

Tólto da Gaxetaveneta.com

Co parlemo de progrèso, a vardemo senpre le inovasiòn tecnolojeghe e se iludemo. La verità trista invese, a xé ca le règole e exijense de marcà le inibìse, le ostàcola, le blòca la resèrca, e le inpedìse ca el progrèso el pòsa èsar distribuìo  l’omanetà.

El càxo de le enerjìe alternatìve e ecosostenìbili el xè el pì enblemàdego. Fèmo na carelà de exìnpi in tùti i setòr :

-Le lànpare incandesensa, le consùma 7de òlte pì de chele a bàso consùmo e racoaxi 9 olte de pì de chéle led. E no la xè finìa, chele bàso consùmo le dùra 3 olte de pì de chéle  incandesensa, e chele  led diritùra 5 olte de pì de chele  bàso consùmo. Par còsa la Philips e conpany tìgnili i presi  alti cusì de le lanpare bàso consùmo (prodùrle industrialmente a costa 20 olte manco del prèso de botega). Par còsa l’Europa àplicala dàsi cusì alti co ste lanpare co le prodùxe i forèsti?

-Par còsa no ghemoli tùti i panèli fòtovoltaeghi sol coerto? A xè da 40 ani ca li vien produxesti industrialmente, se cognose puìto el jeotermego, l’eolego, e se pol construìr na infinità de sentràl microidroeletreghe. I còsti reàli de ste tecnolojìe li xè gran bàsi e no cheli ca vé vende l’idraulego o l’architeto de fameja. Par còsa vorli farne consumàr tùto el petrolio invese de doparàr ste creasiòn e inovasiòn tecnolojeghe?

-Le màchine idròjeno o gas, o eletreghe le ghe xè xà e a costi anca bàsi sa se vol. Par còsa no entrele de prepotensa sol marcà? Par còsa vòrli vendarne ncòra motòri a sciòpo co na montagna de fero e aluminio?

La verità del sistema economego osidentàl, la xè ca copyrights, patentini, e intaresi economeghi lobbysteghi, li ritarda el progreso e li pilòta l’omanetà no vèrso el mejo, ma vèrso chel ca fa goadagnàr de pì na minorànsa. La stòria del copyrights la xè sòl na invensiòn pa inciavàr el privilejo e blocàr el progrèso. Vardemose intòrno : careghe, tole, rùe, botòni, vestìi, struminti muxicàl, construsiòn…. imajinè sa i inventòri de tùta sta ròba li ghese pretendesto el copyright.

La verità la xé ca rento i laboratori de le gran corporasiòn, a ghe xè patentìni (brevèti) ca li vien depoxità col scòpo de inpedìrghe altri de fàr dele ròbe. Bona pàrte dei brevéti li vien conjelà pa blocàr l’inovasiòn. El progrèso el devènta reàl sa podemo tocàrlo tùti e godèrghine tùti. Tùti ghemo el dirìto e dovèr de goder de le inovasiòn sensa bariere e inpoxisiòn. Tùta l’omanetà la partèsipa al progreso, dal stradìn ca bonòra matìna scòa, al siensiàto ca laòra soi laboratòri. Tuti ga el dirìto de godèrghine.