PLEBISCITO.EU | PNV. Press News Veneto

El premio Nobel par la paze a Obama el ga sorpreso tuti. Anca el vinsitor el ga ameso che la xe stà na decision bazà su promese (“hope”) pì che su fati concreti.

Se el potensiale xe el metro de misura, alora el presidente Usa de sicuro se lo ga merità almanco par aver ridoto le tensioni col Venesuela, l’Iran e la Rusia.

Ma se ghe xe un canton de sto mondo indove de sicuro no gà otegnù gninte, né co promese, né co fati, sto postezin a xe la meta tanto decantà dai turisti mericani.

Venesia e i dintorni veneti i xe l’aprodo prinsipale par milioni de sitadini mericani. St’area la xe anca casa de basi militari mericane, tipo Aviano e la caserma Ederle de Vicensa.

A xe dai ani ’50 che sto posto xe stà critico par la guera Freda par via che l’è al sentro de l’Europa e el gera a confine co el Bloco Comunista. Ancó a xe ncora strategico par via che l’è na tapa sicura par le trupe che le torna indrio da l’Iraq e da l’Afganistan.

Pochi posti in Europa i xe stà pì pro Usa che l’entrotera veneto. No xe mia solo i schei dei turisti che i xe benvegnùi dal Lago de Garda darente Verona, fin su nte le Dolomiti, e zó pai canali venesiani. Generasioni de soldà mericani i gà girà bar fora dala base e fato anca festa co la zente del posto.

Deso no xe pì cusì.

I soldà deso i xe istruìi a far de manco de lasar la base, e se i ga da farlo, de tegnerse chieti, e adiritura de vestirse a la europea par no risaltar.

Sta ostilità percepìa (che preocupa i soldà statunitensi, ma pararia de no i turisti mericani) la ga poco a che far co sentiminti de anti imperialismo, ma pitosto a ga a che far co on problema locale pitosto banale.

Soto l’aministrasion Bush, el Pentagono el ga deciso de verzer na seconda base militare a Vicensa. Come aleato Nato, l’Italia no ga vudo problemi a render disponibile el poco doparà areoporto de Vicensa, el Dal Molin.

Anca se par mezo secolo Vicensa no la ga mai vudo problemi a ver na gran base militare mericana nte la so periferia, la popolasion la se gà revoltà co la notisia de sta seconda base tanto pì visina al centro e ai vari palasi paladiani.

Par preciso, el governo merican no’l gavaria colpa parché par nar vanti el ga solo de bisogno del parmeso del governo centrale talian. Ma se uno dei obietivi del novo premio Nobel a xe de riscatar la reputasion mericana, no’l faria male a scominsiar dai amisi pì visini ala Merica.

Tanti posti in volta pa’l mondo no i ga i standard de libartà e democrasia mericani.  Difati la cooperasion mericana co regimi foresti la ga finio par alienar la popolasion de sti paesi.

Come che se ga visto da altre notisie, el governo talian el ga i so problemi. Ntel caso de Vicensa a se gà fato sentire un movimento trasversale, ciamà No Dal Molin, ma el so percorso legale a xe petà fra le sorde rece romane.

El denominator commune de sta organizasion citadina contro la nova base no xe mia l’anti-mericanismo, o sentiminti contro la guera. El problema principal contro  sta nova base a xe prima de tuto urbanistego, e tuto quel che i vol a xe de aver un voto citadino par aprovar on progeto de ste dimensioni da drio casa.

Proteste a parte, el No Dal Molin el ga intrapreso un percorso legale, e ga anca vinto in te un primo momento. Pultropo, la decision de render la base sogeta a na decision popolare la xe stà bocià a liveli centrali.

Dato che el sistema legale taliano no porta da nisuna parte, l’unica “speransa” par Vicensa (a parte de sevitar far cagnara fora dal sito dela base) a xe l’omo che ga fato sognar el mondo prometendo “cambiamenti in cui podemo credarghe” (change we can believe in).

Ste chi le xe robe da poco che gnanca rivarà su la tola del presidente Obama o de la Segretaria de Stato Clinton. Ma ste chi le xe i picoli paseti de poco costo che parmetaria a la Merica de far grandi salti par otegner aprovasion internasionale.

Par esempio, far la base solo se ghe xe aprovasion locale, co na bona campagna sui benefici par l’economia locale, risciaria anca de vinsere suporto popolare. Se no, fa sta base da nantra parte parché ghe xe de sicuro altri paeseti che no ga problemi a aver na base mericana e i schei che porta.

Invese de preocuparse de far amicisie co ditatori distanti, parché no guadagnarse sto premio Nobel raforsando l’amicisia co i pì visini amisi de l’America (che xe la zente europea, e no i leader europei)?

El pentagono el pol rivar a aver la so benedeta base militare in tante maniere. Saria pì inteligente farlo in maniera che i propri militari no i gapia da camufarse da europei co che i va farse na gita nte le coline alpine. E dopo cosa, lanciar n’avertimento pai turisti mericani de vestirse co majeta a righe e capel de paja prima de saltar in gondola?

Filipo Dal Lago
PNV (Partito Nasional Veneto)