PLEBISCITO.EU | PNV. Press News Veneto

No conoso nisuni ke na volta convinto deła indipendensa el gapia canbià idea.
Tanti deluxi, rasegnà, e demorałixà, sì (e anca par bone raxoni). Ma nisun, ke na volta digerìo łe ragioni de l’indipendensa, ke’l gapia fato dietro-front dixendo: “no, preferiso star soto el taco del stato talian”.
Ałora, el nostro obietivo in vista par łe prosime regionałi 2010 no xe el numaro de caregoti e careghete, o łe potensiałi aleanse de tuti i cołori. El nostro intento a xe de rancurar su pì consensi posibiłi par l’indipendensa veneta. Se trata de on laoro rivolto a persone nóve e verti de mente. Persone ke no xe cristałixà su ideołogismi tricołi, ma ke łe xe disposte a tor in considerasion łe nostre motivasion storike, culturałi e economike.
Eco, par cuesto ła nostra formasion saltà for a dal congreso de domenega ła xe xovane.

Ła media d’età del Minor Consejo ła xe de 40.14, ła media de età del Consejo dei Diexe xe de 32.75, e pai curioxi łe età de Texoreria, Segreteria e Presidensa łe xe rispetivamente 31.6, 40.4 e 36.1 :-).

Semo on partito xovane parké rivolto ai xovani.

Semo na forsa połitega ke varda al futuro e ke no se limita ai miopi interesi de pansa deła partitocrasia geriatrika taliana.
Dando na man al Pnv, co racolta firme par prexentarse ałe regionałi o finansiando el Veneti al 1000×1000, a semo drio dar na man a costruir na baxe indipendentista par tuti. Parké ricordemose ke l’indipendensa a xe no stroxo a senso unico. Na volta verti i òci verso l’indipendensa nisuni torna indrio.

Lodovico Pizzati
Presidente Pnv