PLEBISCITO.EU | PNV. Press News Veneto

de Lodovico Pizzati

I cuotidian taliani i xe infestà de brute notisie. Camoristi che i copa zente par strada, carabinari che ricata połitici in maniera metodica e regołare, guardia de finansa che fà i prepotenti rento łe filiali dełe banche svisere… che tristesa. Daltronde no podemo spetarse altro da no stato che ne sofega tuti i di, da on sistema parasitario che par setant’ani ne ga ciucià el sangoe sensa darne na fregoła indrio.

Mentre el mondo se riprende dała crixi globałe co cresite del 8.9% in Cina e 3.5% in Usa, el contenitor Italia invese a xe drio darne el colpo de grasia. Co na produsion industriałe in cało tendensiałe del –18,3% rispeto a l’ano pasà, ła gerontocrasia itałica ła xe sta bona de sfibrar łe nostre industrie. I xe sta boni de stuar el spirito de na generasion de inprenditori fenomenałe che dal gninte i ga creà on modeło economico invidià da tuto el mondo.

Epure, par cuanto i sevita bruxar el fruto del nostro laoro, ła tera veneta ła xe ncora fertiłe e taca butar da novo. Ełora RELAX.

No, no digo de rilasarse de fronte ałe ingiustisie de no stato cołonixator che tanto nantri połentoni gavemo senpre risorse da farse robar. Relax xe el nome de ła nova cufia prodota da PubCompany de Albignaxego (PD). On toxo veneto se ga inventà na cufia che interpreta łe onde cerebrałi e te permete de dar comandi a on computer soło “pensando”. Cołosi internasionałi dei videogames come ła Nintendo e ła Electronic Arts i xe za drio contendarse l’escluxiva. El titołare Andrea Gaiba el xe de Venesia, el software xe stà sviłupà a Longarone e el design dełe cufie xe sta fato a Padova.

Come Gaiba gavemo tanti altri ingegneri e programatori che i xe drio far vałere l’inventiva veneta in tuto el mondo. Emanuełe Fornaro, trentene de Padova, el ga svilupà AroundMe, na aplicasion par l’iphone co pì de 5 milioni de download. Insoma, ła voja de far e inventiva veneta no ła more mai. Par generasioni gavemo esportà menti, tipo Federico Faggin ghe tocava nar a Silicon Valley par inventar el microprocesor e ła Synaptics. Deso xe ora de darghe a sti nostri inprenditori l’infrastrutura necesaria par mantegner in veneto ła so operatività.

L’Italia ne gà distruto na generasion de picołe inprexe che se gà fato da sołe co tanta fadiga. No stemo darghe ła posibiłità de stritołar anca łe nove leve, łe nove inprexe che pol crearne laoro in setori high-tech, e produr prodoti veneti de avanguardia e al top mondiałe.

Come società gavemo ła responsabiłità de rancurar ła nostra tera par mantegnerla fertiłe, parché gavemo ncora semensa de scorta che ne parmetarà de fiorir da novo. Destrighémose da sti veci sparonsoni foresti che no ga cura del nostro broło. Se torna cresar soło se catemo el corajo e ła responsabiłità de no eser pì połitegamente dipendenti.

Indipendenza, no se pol far de manco.

Lodovico Pizzati
Presidente -PNV