Veneti Libari e Responsabili

L’independensa xe la ciave par el nostro benesere e felicità. Fin qua a semo tuti dacordo, almanco rento el Pnv. Solo col surplus de risorse che gavaremo (e che al momento le vien mal gestìe xo a Roma), come stato indipendente saremo a posto sia co manco presion fiscale che co aumento de servisi (scola, sanità, pension…), in quantità e in qualità.

La domanda che naltri de Veneti Lìbari ponemo la xe: volemo incontentarse de sto sistema mediocre, o volemo far de mejo?

Na volta indipendenti gavaremo l’oportunità de far su le basi par na strutura politega pì eficente e pì rispetoxa dele persone, dele so robe, e dei so veri diriti. Eco la nostra vixion:

• El primo problema de tante democrasie moderne xe l’acumulo mostruoxo de debito publico. El stato talian a xe el pexo dela clase, ma ghe xe un trend preocupante anca par tuti straltri stati. Xe fasile par na clase politega spendare e spandare co che a pagar xe tuta la citadinansa, o, pexo ancora, le generasioni future. Par regola costitusional (abrogabile solo co na super-magioransa) volemo vietare el deficit publico: ogni ano el stato veneto no’l pole spendare pi de quanto che xe le entrate fiscali.
• I politici i xe furbi, e ghe bastaria alsar le tase par finansiar la so vorace fame de spexa publica. Sempre par regola istitusional (abrogabile solo co na super-magioransa) volemo vietare l’aumento dele tase. Come partensa gavaremo la presion fiscale eredità dal stato talian, che sbaseremo gradualmente par no crear presioni inflazionisteghe. Ma da sto livelo le tase le podarà nare solo che xo.
• Semo contrari a na strutura centralista anca par no stato de medie dimension come la Venetia. No se incontentemo gnanca de on sistema federalista. Volemo na confederasion (tipo Svisera), dove ogni provincia (o canton, o comunità, o contea – vedaremo) la ga el dirito de cavarse fora se l’apartenensa al stato veneto no ghe agrada. Ghe xe cantoni che se separa dala Svisera? No, apunto parché el governo svisero el riga drito parché no pol parmetarse de sfrutar i propi citadini (se no li perde).
• Decixioni le ga da eser tolte el pì visin posibile al citadino. Sarà la politega locale a decider se mantegner o sbasar na tasa, e come spendare le entrate. In sta maniera fra vari cantoni/contee/province i pol far a gara al ribaso. No ghe sarà on governo centrale che pol inpor co arogansa le so decixioni. Semo persone adulte e responsabili e semo boni rangiarse par mantegner salda la nostra fibra sociale.
• Ogni tasa la ga da eser giustifegà. Basta co sto buxo nero, indove no se sa come vien spexi i nostri skei. Volemo saver dove ke i va i nostri schei e par cosa vegnemo tasà. Serve la tasa par pagar el stipendio ale maestre? Bon, vedemo la contabilità, vedemo se ghe xe ineficense. E se par caso no basta i schei, podemo decider anca de far coleta fra genitori. Ma se no volemo on servisio no semo obligà a pagarlo.

La nostra filosofia de base xe che no semo persone ignoranti, e ansi ne savemo de pì dela clase politega. Elora no acetemo l’arogansa politega de dirne cosa che xe le priorità sociali e quali no. Ogni singola persona la sa cosa che xe el mejo par ela. Solo ogni individuo el pol far le mejo sielte par el so futuro. No gavemo bisogno de on governo babysitter che ne estorce tochi dele nostre proprietà tramite omeni vestìi de grixo parchè i sa lori come mejo spendarli “per il nostro bene”.

Naltri veneti semo xente libara e responsabile.  Gavemo el potensiale de far mejo dela Svisera. Na volta indipendenti no stemo crearse nove chebe e gabioti. Indipendenti e contenti.

Comitato promotore
Veneti Libari
Partito Nasional Veneto