PLEBISCITO.EU | PNV. Press News Veneto

El Corriere del Veneto riporta ke anca sto ano i veneti i xe leader indiscusi de donasion de sangoe. Sicome ke ste notisie łe vien riportà soło ke a liveło locałe, tołemo nota de sti dati. Cusì, ła prosima volta ke calkeduni ne da de rasisti/egoisti, a podemo ribater co na scianta de dati e fati.

Rento el stato talian, i veneti i xe leader de sołidarietà e vołontariato. Eco, par exenpio, i numari de donasion de sangoe e midoło:

-187miła unità rancurà ntel 2009

-58miła kiłi de sangoe donà ntel 2009

-In sto ano de crixi łe donasion łe xe aumentà del 2% rispeto al 2008.

-El surplus de sangoe veneto el xe ndà a regioni in deficit, tipo Lazio, Sicilia e Sardegna.

-In vałori totałi ła Lonbardia ła dona pì del Veneto, ma soło parké i xe el dopio abitanti de noaltri.

Ora, tanti i fa fadiga a conbaciar sta generoxità veneta co ła nostra voja de indipendensa. Ałora gavemo da precixar ke eser sołidałi no vol mia dir eser mone.

Na roba xe ła decixion personałe de cosa far col proprio tenpo (nar xo in Abruso a dar na man), col proprio sangoe (na vałanga rosa) e coi propi skei (donasion par ki ke ga fame). Nantra roba xe eser soto el taco de no stato ke no sentimo nostro, e ke tołe el fruto del nostro sudor par darlo a na “lobby” ke tien sotosviłupà i nostri cugini dal taco.

Na roba xe el totałe dełe nostre decixioni individuałi ke ne fà on popoło generoxo. Nantra roba xe no vołer pì eser suditi de on regime ke ne obliga a pagar tase par dopo spendarle małe.

Na volta indipendenti sevitaremo eser primi in donasion del sangoe, vołontariato pai teremotà, e a dar skei par ła fame ntel mondo. Saremo on popoło libaro de eser tanto generoxo cuanto prima.

Ma saremo dopiamente generoxi cavandose de doso sto parasita de stato italian parké al momento semo drio darghe linfa a on sistema mafioxo e clientełare ke mantien economicamente sotosviłupà łe popołasioni siciliane, sarde, canpane, e całabrexi.

Na volta libari noaltri, i sarà libari anca łori, e i tacarà cresar pì in presia de noaltri. Propi come ła Slovakia, ła parte pì poareta deła vecia Czechoslovakia, ła gà tacà creser de pì deła pì rica Republica Ceca.

A semo boni ‘fa el pan.

Lodovico Pizzati

Presidente PNV