Da cristian cresù in te na çità al 100% catołica, el crocefiso picà su in aula a xera na roba dà par scontà, na parte integrante deła nostra cultura. Ancó, o par imigrasion o par na crésita de laicità veneta, ghe xe na minoransa rento ła nostra socetà che no se riconose in sto sinboło. I varda ła lege e i pretende che’l vegnà cavà xo.
Come genitore che ga optà par l’ora facoltativa de rełigion, mi go da darghe raxon. La scoła ła xe na strutura “statałe” e secondo łe regołe no ga da esarghe sinbołi rełigioxi. Pitosto el problema xe el raporto che i veneti i ga co el stato talian. I xe disposti a pagar el 60% del proprio redito in tase par risevar servisi statałi, e dopo i se lamenta par łe decixioni centrałiste tólte in te na capitałe distante.
Vardando el sistema merican noto invese che ła xente ła se tien i so schei (pagando manco de ła metà de noialtri) e dopo i decide łori dove mandar i putèi scoła. Ghe xe scołe publiche par chi ca no pol parmetarse altro, ma ła stragrande magioransa de fameje ła pol parmetarse na vasta sielta de scołe privà, apunto parché no i vien disanguà de tase.
De ste scołe privà el groso łe xe de denominasion cristiana, e par ła magior parte łe xe scołe catołiche co rento i so crocefisi. Naturalmente no te ghè da eser cristian par nar a na scoła catołica, e te cati putei de altre rełigioni parché łe fameje łe tol na decixion in baxe ała cuałità de l’educasion.
Sto sistema scołastego el xe cusì fin a l’università. Georgetown University, dove ca son ndà mi, ła xe de proprietà de gexuiti. I ga na croxa granda tuta na parete de on edificio de çincue piani, oltre che a na cexa in mexo a dormitori e bibioteca. Georgetown el xe pien de studenti arabi e abrei, co on dipartimento de studi medio-orientałi fra i pì rinomà del mondo.
A nisuni ghe pasa par ła mente de meter in discusion crocefiso e cexa, parché i se rende conto che i xe in caxa de altri e a xe bona creansa rispetar łe uxanse dei paroni de caxa. I va a Georgetown, no parché ła xe gexuita, ma par ła cuałità de insegnamento e altro.
La scoła de stato taliana no ła xe mia caxa nostra ełora mołemoghe de lagnarse. Pitosto domandève parché paghè cusì tante tase par dei servisi che no ve torna indrio. Chi ca vol el crocefiso in aula, el ga da mandar i fiói in te na scoła privà catołica. E se ve costa masa no stè far ła carità parché ste scołe privà łe vegna susidià. Gavemo da pagar tanto manco tase par poder parmetarse de mandar i putei in te ła scoła ca vołemo.
Vardè che co l’indipendensa gavaremo on cało dełe tase tale che anca el cuartiere o paexe pì poareto podarà parmetarse de sostegner na scoła che paga łe maestre el dopio de deso.
Libartà de sernir na scoła con o sensa crocefiso. Dopo vedaremo cuałe gavarà un curriculum pì sołido e vegnarà premià dała libara sielta dei genitori. Sto sistema de ver el sistema scołastego rigido e conpagno par tuti e controłà da distante no ga nesun senso. Mi son contrario a sto sistema italiano sia che ne inponga crocefisi obligatori par tuti, o gninte crocefisi par gnisun.
Lodovico Pizzati
Presidente – PNV
If you liked my post, feel free to subscribe to my rss feeds
Firma per il VENETO INDIPENDENTE!
I 120 Dogi della Serenissima Repubblica di Venezia
Iutane, fa na picola donasion!
Veneto è chi il Veneto fa
il pnv su facebook
twitter
Scottish National Party, SNP
BlogoSquare
New blog post: El Crocefiso http://bit.ly/3hHIAv
Ben dito!
Mi son àteo: a le superiori son na da i Salesiani, e i g’avea picà dapardut croxifìsi, madòne e la soméja de Don Bosco. L’era na scóla catòlega e cosita l’è.
Ma inte le scóle d’el stato no ghe dovarìa stàr simboli de religión. Sta situasión d’el croxefìso l’è sta “piovegà” da na misiéra Filandexe. Ma dut cuanti (jornalisti e polìteghi taliani) i fa credàr a dut che l’è on atàco de i islameghi: l’è dexinformasión.
Bixognarìa far cofà en Frànsa: andoe en dut i palàsi pióveghi no se pól far vedàr simboli de religión, donca ànca le dòne islameghe no le pól metàrse entorno le palandràne ca la de lori religión ghe inpón.
Me cato abastansa dacordo co’l autore de sto scrito, anca se secondo mi ghe vołe comunque na scoła publica de bona quałità perché anca se uno xe poareto ga da avere el dirito a na educasion adeguata.
P.S. e conplimenti par ła grafia… magari i scrivese tuti cosita!
Cuel che me infastidise de tuta sta storia lè che una corte estranea la se permeta de calar sentense contro la nostra tradision catolica. Che ne piasa o no, el nostro lè un paese catolico da senpre. Anca la Serenissima la jera fondà sul catolicesimo, anca se la se mantegnea ben destacà dal Vaticano e dale so pretese. Secondo mi, se dovarìa dalbòn difendare la tradisiòn cristiana del nostro popolo, parchè deso l’Europa lè drio a svodarse dei so valori e dove se fa un vodo ghè senpre calcosa che va a impenirlo. In sto caso sarà i musulmani a provedarghe. Volemo far la fine dei Bisantini, ne piase sta prospetiva?
Anca mi digo la mia , secondo el me punto de vista xe’ el nostro modo de vivare del cristian che xe’ determinante come GESU’ me ga’ insegna’ de vivare, amare DIO sopra ogni cosa( LINEA VERTICALE)), e amare el prossimo come noi stessi (LINEA ORRIZZONTALE) da questo simbolo impresso nello spirito e nell’anima umana se ga da crociffiggere el proprio io e non un simbolo esteriore che pure i cattolici de bona volonta’ non i ghe fa minimamente caso gnanca in chiesa anca se i crocifissi i xe’ grandi come grattacieli. PAR mi non sta nel de fora la vera salvezza ma secondo GESU’ la vive dentro de noialtri, dopo ognuno le libaro de credere come vole.
No vojo intrar intel tema relijoxo parché ogni Persona la ga el dirito de sevitar coel ca la crede, e co coesto vol dir ca on musulman o on ateo i ga da poder credar so coelo ca i vole. Personalmente son de idea simile a coela de Leolam, co la particolarità de eser agnostico, par cui digo SE Dio ghe xe coel el vive rento de nantri e no fora. Na vixion protestante donca, e oviamente ligà a la tradision christiana.
Dito coesto però penso ca coel ca xe el Stato, ovèro la reprexentansa generale de tuti i citadini, no el pol mostrar segni de na religion, parché se no altri (come xe dexà capità co i musulmani) domandarà de far vegner fora i SO SEGNI, magari metendoli de fianco. Ma le scòle le ga da eser espoxision de simboli religioxi o posti ndo la zente studia e impara le siense e le raixe culturali? Notare ca mi no son contrario a la ora de religion, basta ca sta ora la sipia intexa cofà studio general de tute le religion come fenomeno sociale e human, e no come studio dotrinale.
Tuto coesto no vol dir reprimere le tradision, parché xe evidente ca la nostra popolasion la riva da na storia segnà da el christianeximo, da el catoliceximo venesian (ben distinto da coel papale) e finalmente da el secolarismo.
Coesta no xe tera de tradision musulmane o budiste o altro. Semai xe stà tera ca la ga ospità defèndendolo el ateismo e altri punti de vista in contrasto co la cexa romana (vedi Galileo), e no ga mai imposto na religion de Stato.
Quindi sicome na cultura no pol eser sofegà da altre culture da na parte sarà normale ver campanili e no minareti, da coelaltra a xe justo respetar el credo de tuti ca ogni on pol profesar sensa par coesto far tanto clamore e tanto exibisionismo.
Ma el punto pì importante el xe ca el dirito de libartà de ogni Persona, incluxo coel de profesar la propria religion, el pol eser garantio solo e soltanto se el Stato el xe neutro.