PLEBISCITO.EU | PNV. Press News Veneto

Stamatina a jero drio ciacolar co on me cliente e serimo drio a far calche considerasion so sti tenpi de incertesa indove tanti i ga l’inpresion che la festa la sipia finia par senpre; e mi a son de l’idea che se seitemo a voler esar cusita bauchi da star drento sto contenidor cadaverico italico, la festa gnanca se ricordaremo pì sa ela. Mi go dito che ancò a no serve pì gnanca laorar tanto parché co te brinchi co strafadiga do schei, i riva i avoltoi italici che i te roba el fruto del to laor. No ghe xe gnanca el incentivo a laorar.

Lu el me ga vardà e el me ga dito na fraxe che la me ga propio colpìo: “Arda, sa pensito che’l xera el famoso ‘miracolo del nordest’ che i dixea tanto? Laoro! Nisun miracolo! Verzar el capanon a le 7 de matina e tornar in caxa a le 9 de sera. Laoro! Cuei che i descorea de ‘miracolo’ magari no i xera masa bituà a laorar”. El laoro, la voja de far, el corajo de far on salto intel vodo e metarse par conto proprio: sto contenidor cadaverico italico l’è drio cavarne anca la nostra linfa. L’è drio cavarne na roba on mucio piasè inportante dei schei (che l’è senpre drio robarne): el nostro steso esar. I ne cava parfìn la voja de intraprendar, i ne lasa cusita in mudande par tirar vanti co sto Stato fondà sol parasitismo e consacrà al sfrutamento dei produtori e i ne taja cusita le ganbe co la burocrasia criminal, che semo invià so la strada de la rinuncia. Sto contenidor cadaverico italico l’è drio infetarne senpre de pì.

Fà tante jornade de sti tenpi, anca ancò a jero n’atimo depreso. Scoltàr tuto el dì previxioni fosche te pol sfiancàr, zontemoghe el tenpo grixìn e capì anca vialtri che sarìa mejo fermarse direto inte on bar e mandar xo na graspa. Però l’è capità on fato che’l me ga tirà n’atimo suxo. Visin Sitadela, so on muro a go visto na scrita in roso: VENETIA INDIPENDENTE 2010. Bon, sta scrita mi la go vedesta cofà on sprono, on tiròn par svejarme. 2010, l’è dopodoman. A ghe xe tante robe da far, ma na Venetia libara intel 2010 no l’è mia n’utopia. Intel 2010 co le elesion regionali se pol concretamente farghe metar le baxi a la Venetia parché la torni da novo a volar, parché la nostra voja de far no la sipia copà definitivamente ma inveze la deventi sento olte pì forte e parché el laoro no’l sipia pì ofexo e smorbà fà l’è in sto contenidor cadaverico italico.

Però ne serve el to aiuto. El PNV el ga bexogno de xente, de volontari, de persone che le se tol l’inpegno de iutar concretamente par calche ora la stimana. Iutane! Iscrivate!

A spero ben che no volì mia che me ferma inte on bar a ber na graspa de pomerigio; era?

Luca Schenato
PNV Verona