PLEBISCITO.EU | PNV. Press News Veneto

A me tòca riscrivar kive coel ca go dexà scrivo altrove: ( https://www.pnveneto.org/forum/phpBB3/viewtopic.php?f=3&t=1403&start=0#p4514 )
No xe simpatico citarse da soli, ma go da farlo:

Se se lexe qualunque voxe enciclopedica e soradetuto so la terminologia juridica a level internasional le do parole le xe ligà fortemente tra de lore, in cui “selfdetermination” [autodeterminasion] la xe na atività, e “independence” [independensa] la xe el stato (da no confondar co el Stato) ovèro la condision in cui se pol exercitar coela atività de autodeterminasion.
La autodeterminasion la xe donca on ato deliberatorio, la independensa la xe la condision sine qua non la autodeterminasion posa eser exercità.
La independensa pol eser dichiarà, no exercità, la independensa la xe on status de fato, ca par altro el vole alcuni elementi ciave par poder eser tale: capacità economica, capacità juridica, teritorio, popolasion. Faso notar ca sti kive i xe requixiti domandà da la legislasion internasional, ca, lo recordo, la xe fundamentalmente costituia da tratà internasionali (no pol existar on al de sora dei stati sovrani, donca la lege tra stati la xe coela concordà tra i istesi, mediante acordo so tratative, i tratà internasionali, apunto).
La autodeterminasion la xe invese el exercisio de la volontà de na popolasion, sensa dover sotostar a ingerense da parte de tersi. Potensialmente quindi la autodeterminasion podaria manifestarse anca in caxo de incapacità de eser independenti, ma de facto la saria invalidà [sta autodeterminasion] da el fato ca no ghe saria i istrumenti par poderla realizar in pratega. Par far on exempio, on popolo el podaria autodeterminarse e stabilir par exempio na so legislasion, ma se par poderla fare no el xe in grado de rendarla eficace e el ghe ne subise le ingerense de on stato foresto (o anca solo de nantra popolasion), la so independensa no la existe e gnanca la eficacia e la efetività de le so decixion, par cui sta autodeterminasion la peta doxo.

Riasumendo. La independensa la xe on stato de fato, na condision ca la ga anca da eser ogetivamente suportà dai fati. La autodeterminasion el xe el ato de exercitar la volontà de la popolasion ca la se autodetermina, sensa la condision ca rende posibile eser independenti de facto efetivamente no existe autodeterminasion.

Prova del 9? El APV el xe el exempio pì lampante. Luri dixe de eser dexà independenti, luri i dixe de autodeterminarse co el so autogoverno (ca el xe on organo derivà da la decixion ciapà da volontà popolare, overò el efeto pratego de la autodeterminasion), ma de facto i ga subio anca el sequestro e la violasion teritoriale da parte de le forse de el ordene itajane. No ghe xe independensa sensa capacità de poderla efetivamente realizar.

Concluxion. Discorar so le diferense semantiche tra i termini “autodeterminasion” e “independensa” el xe inutile.
Infine se ga da recordar ca i termini xe anca coeli comunemente acetà, donca se ga da vardar la acesion pì condivixa, e uncò la acesion pì condivixa a me parere la xe propriamente “autonomia” otegner pì diriti de decixion locali ma sotostar a le decixion de el stato, e “independensa” la separasion netà ndo tute le decixion le xe ciapà da la popolasion ca in sto modo la se autodetermina.

Cui prodest?