PLEBISCITO.EU | PNV. Press News Veneto

El Scottish National Party, cioè el Partito Nasional Scosexe, l’è coel partito al goerno de la Scosia che l’è drio batarse par verghe intel novenbre del 2010 on referendum par l’independensa de la Scosia dal Regno Unio (che dopo no’l sarà pì tanto unio).
El sinbolo de el Scottish National Party el vien ciamà da tuti “the clootie dumpling” (se pol tradur co “el fagotìn vestio”) parché el someja a la confesion stilixà indove el vien meso da tradision sto, apunto, clootie dumpling, cioè on dolze tipico scosexe. In realtà, el sinbolo del SNP el sarìa na conbinasìon tra do imagini stilixà: el “Saltire” (dita croxe de Sant’Andrea) e el fiore del cardo; tuti e do sinboli de la Scosia. Come podì vedar, coindi, el SNP no’l se ga mia limità a piasàr in bela mostra la bandiera de la Scosia ma el se ga sforsà de elaborar on sinbolo suo, distintivo. El SNP no’l se ga sentà xo a doparar, sensa riguardo, on sinbolo potente dexà pronto fà la podea esar la Croxe de Sant’Andrea. Se mi no l’avese leto intel so sito, no ghe sarìa mai rivà che el sinbolo del SNP la xe na conbinasìon stilixà de sti do sinboli; conbinasìon che la fa saltar fora on sinbolo novo, el clootie dumpling.

El Venetian National Party, cioè el Partito Nasional Veneto, l’è coel partito che, dopo le elesion “regionali” (regionali par i tajani) del 2010 el portarà el Veneto al referendum par la so INDEPENDENSA. Ripeto par no verghe fraintendimenti lesicali: INDEPENDENSA, dita anca Indipendensa, Indipendenza, Independence, Indépendance, Independencia, Unabhängigkeit, Independenza, Dokuritsu, etc etc.
El Partito Nasional Veneto, cofà el Partito Nasional Scosexe, no’l se ga mia sentà xo. El PNV el ga volesto dar on segnal forte e ciaro, el ga volesto dir: no semo mia n’altro partito che dopara el Leon par rincurar coei voti che el Leon in automatico el te fa ciapàr. No, nialtri volemo ndar oltre, on fraco oltre. Semo chive par dar LA svolta a la politica veneta e, de conseguensa, el ne serve on sinbolo de svolta. On sinbolo novo, fresco, moderno che ne diferensia da la palude.

A coei che i ne dirà, e ghe meto la man sol fogo che i ghe sarà, che no l’è mia posibile che on partito che’l vol l’independensa del Veneto no’l gavia mia el Leon, faxighe notar che la foja de tilio l’è on sinbolo veneto che pì vecio no se pol e che gavemo masa rispeto par el Gonfalon de San Marco ché no volemo mia confondarse co coei che i ga doparà (me vegnarìa da dir “sputanà”, ma a son costumà e no lo digo mia) el Leon par le so politiche che no le ga portà a niente.

Ghe semo, semo senpre pì forti e deso ghemo anca on sinbolo che ne rispecia inte la nostra voja de far e sbarajar el canpo veneto da politiche vece e finte-nove. Ghe semo e me par che in tanti, intel ben (de nialtri) o intel mal (de luri), i sipia drio incorzarsene.

Luca Schenato
Pnv Verona