PLEBISCITO.EU | PNV. Press News Veneto

El Virus el se propaga senpre de pì

El pol esar el fato che me son brincà el rafredor, ma mi l’è tuto ancò che a go ciara sta idea inte la suca de l’independentismo fà on virus che se propaga inte na maniera rapida e pandemica. Tanti i serca de tegnerlo bon, i serca de lansàr so na popolasion, inpauria da sti periodi grixi, vacini de “unità”, de “federalismo solidale”, de “padania”, de bataje sora str****de bone solo a far perdàr tenpo. Ma sti vacini i xe masa fiachi e no i risolve niente. Insoma, sti vacini lofi no i’è mia boni de starghe drio al Virus Veneto ca el core, el se adata, el parla la lengoa che la xente intende.

Sto Virus, che l’untore PNV el dispensa a drita e a manca, l’è fatale par cuei che i ga dexà la voja de tornar independenti, a no ghe xe niente da far: i se lo ciapa tuto e i vien rento al PNV. Go vedesto sto Virus in asion de recente e me son dovuo arendar a l’evidenxa: a on independentista intel cor, na olta che l’è vegnuo in contato co el Virus Veneto, el capise subito che el PNV l’è la so caxa; la caxa indove el termine Independensa no’l vol dir altro ca Independensa.

Cuei inveze che i xe “vacinà” da na vida (se scuminsia co la scola e se va vanti co la TV) co doxi da cavalo de retorica italiota (o italo-padana), co masice iniesion de ignoransa sora la cultura veneta e al canviamento in ben che ghe sarìa co l’Independensa, eco, sti tipi da prinsipio i te varda storto e, se la te va ben, i te apostrofa cofà “utopista” o, se la te va mal, fà “pazzo”. Ma l’è solo aparensa! No staxì a credar! El Virus Veneto l’è ndà drento e’l ga scuminsià el so laoro de proliferasion. El mesajo ciaro, moderno, baxà sora strasolide raxoni no’l teme bariere: el ga solo bexogno de verghe davanti na persona co na sciantina de curioxità inteletual, che la gavia ancora drento on lumin inpisà.

El Virus Veneto l’è drio tacàr. Sta qua la xe la vera pandemia che la fa ndar intel panico i politici italiani. L’untore PNV l’è drio far el so laoro. Iutalo anca ti parché, l’è ciaro patoco, te si infetà dai cavei a piè.

Luca Schenato
PNV Verona