PLEBISCITO.EU | PNV. Press News Veneto

Łibaremose dai parasiti da un stato dixastrà e dai so incantadori par poder inovar e far ripartir el motor Veneto

Bon, deso i xoghi i xe ciari.
L’indipendensa ła xe senpre de pì l’unica sołusion che ne resta. E in presia, parché no ghe xe pì margini de sopravivensa economega e siviłe par i Veneti.
Indipendensa vol dir PNV, i xe ła stesa roba. Ła prima ła xe l’obietivo, el secondo el xe el strumento par otegnerla. Deso i gà moso i tochi da 90 (se fa par dir), pur de frenar ła voja veneta de łibararase dal pexo de un sistema marso e oprimente.
Ma i truchi iluxionisti dei aprendisti stregoni tałiani i durarà ben poco, i xe come a neve co ła se volta in piova.
Intieri setori industriałi i xe ndai farse benedir e noi tornarà pì come prima, inutiłe iludarse. El suicidio de tanti inprenditori veneti el xe un canpaneło de alarme inpresionante, par chi che ło vol sentir. Co se copa un inprenditor, vol dir che xe morta ła voja de far, de ndar vanti, co sta Italia małedeta.
Ałora parlemoghe a sti pori inprenditori e a tuti i Veneti che i xe drio perdar łe speranse.
L’unica salvesa che ne resta xe de scumisiar a capir che se gà da inovar.
Par inovar ghe vol schei. Risorse da dedicar ala riserca, ałe università, a un novo sistema de venture capital dedicà ai inovatori de procesi, ai inventori de modełi de business baxai suła dixintermediasion e suła digitałixasion deła magior parte dełe atività economiche, rispeto a come che łe ghemo conosùe fin ancuò.
Łe nostre inprexe gà da poder internasionałixarse, sgravandose dełe tase feudałi che un stato parasita ghe inpone ogni dì de pì. Gavemo da crearghe i network de rełasion d’afari e i cołegamenti che ghe parmeta de far business nel mondo.
El nostro Veneto el gà da dotarse dełe infrastruture tecnologike, łogistike e de sistema che ancuò łe vien negae a cauxa del furto co scaso portà vanti da un sistema de poder chel se rivela ogni dì de pì come na bestia famełica che gà senpre pì fame.
Come Veneto a ghemo na sotoprodusion de energia cauxada da mancai investimenti nel’amodernamento dełe nostre sentrałi, no gavemo fin deso podùo sostegner na cresita de produsion de fonti alternative, o de modełi pì furbi anca de micro-produsion a rete.
No ghemo un sistema universitario moderno, baxà sul conceto de campus. Ghemo fato scanpar i nostri mejo sarvełi in pasà e senpre de pì ło femo nel prexente. I toxi in ganba pena che i se fa un programa universitario Erasmus de studi al’estero e i snaxa come che se vive e łavora, i scanpa prima che i pol a Londra, Barsełona, Sidney, Seattle, Vancouver, Stokolma, Espoo, Amsterdam, New York, San Francisco, Bruxelles. Dipende dai gusti e dałe oportunità de ognun.
No ghemo un sistema de trasporti degno de sto nome, pa ver el pasante de Mestre ghe gà vosùo trent’àni e deso semo drio pagarseło do volte co pedagi da furto. Łe nostre inprexe sconta un ritardo de do dì nei tenpi de consegna dełe so merci rispeto ai so conpetitor nel mondo.
E, par ultimo, ma roba pì grave, el nostro sistema de inprexe el xe tartasà co na gogna fiscal e un liveło de tasasion, asołutamente ingiustificà rispeto ai servisi fornii. In poke parołe łe nostre inprexe e naltri sitadini paghemo łe tase de un svedexe, ma ghemo i servisi de un african.
Par vegner fora da sta situasion deso i Veneti i gà do opsion.
El PNV da na parte el propone na strada imediata par l’indipendensa, co un percorso legałe e democratico che ben savemo, par mexo de un referendum, come chei gà fato in Slovenia, Montenegro, Groenlandia, o come che xe avegnùo in Lituania, Lettonia, Estonia, Republica Ceca e Slovakia e come chei sta par far in Catalunya e Scosia.
Da st’altra parte invese l’Italia ne propina un goernator deła lega che ne dixe de ver pasiensa e spetar che łori i fa i miracołi deła moltiplicasion dei pani e dei pesi a Roma. Che ghe pensarà lu, chel ne vol tanto, ma tanto ben, el SuperGel.
Cosa vołemo far alora naltri Veneti: vołemo rimetar in moto el nostro motor economico, cultural e sivil co l’indipendensa, opur vołemo sventołar fasołeti verdi sperando che intanto che a Roma i ciacoła (e i se magna i nostri schei), a Venesia se spegna el fogo deła disperasion?

A naltri la sielta.
W el PNV, W l’indipendensa!

Gianluca Busato
Segretario PNV
PARTITO NASIONAL VENETO