PLEBISCITO.EU | PNV. Press News Veneto

El storico leader veronese deła połitica veneta vien rento el PNV

Continua ła cresita del PNV che xe drio diventar senpre de pì el novo ponto di riferimento deła połitica veneta. Ła xe na sielta pexante e che spostarà i ecuilibri cueła che ieri gà fato Lucio Chiavegato, el leader storico deła politica veneta e veronese e xà cołona portante anca dela LIFE (el sindacato dei Liberi Imprenditori Federalisti Europei fondà da Fabio Padovan).

Chiavegato – in ocaxion de na riunion publica che se gà tegnùo el 1° de disenbre a Bovolone – el gà infati anuncià el so apogio al Partito Nasional Veneto par łe prosime elesion regionałi del Veneto del 2010.

Ała riunion gà partecsipà anca Gianluca Panto, in corsa pałe primarie del PNV pa ła nomination a presidente del Veneto, Gianluca Busato, segretario del PNV e running mate ałe primarie, Massimo Busato (coordinator del PNV de Verona) e Luca Schenato, tuti do rento el Minor Consejo del PNV, oltre a un publico numeroxo e entuxiasta del novo progeto połitico par l’indipendensa veneta, da otegner grasie a un referendum tra i veneti.

Lucio Chiavegato e ła so sielta coragioxa xe el segnal che tuti spetava che xe drio formarse ła vałanga indipendentista che sta canbiando par senpre ła połitica veneta.

“El me pensiero – gà afermà un emosionà Gianluca Busato – inte sto momento de gioia par ła cresita del PNV el va a tuti i Patrioti Veneti che co el so sacrificio i ne gà verto ła strada, i ne gà inpisà el sarveło e i ne gà scaldà el cuor e che cualcuni deso vorìa farne dixmentegar, dixendoghe ciao ciao”.

Lucio Chiavegato el gà dito: “El momento el xe cueo bon pa ła nostra indipandensa. Ieri sera me son sentio na scosa de adrenalina su a schena. Emoxioni forti che da tanto tempo sognava. Na unica frase sincera VENETO LIBARO subito e sempre.”

Uficio Połitico PNV