Coordinamento nasional del PNV l’8 de xenaro

Venare sera 8 de xenaro a Padova se tegnarà na inportante riunion de coordinamento nasional del Minor Consejo, del Consejo dei X e de dirigenti del PNV. Ła riunion tra l’altro valutarà łe ultime novità in merito ala conparsa de novi sogeti połitisi e ałe proposte ricevùe.

Vegnarà inoltre anałixà el rixultato dełe primarie e sentìe łe prime considerasion dai candidai ke łe gà vinte, Claudio Ghiotto e Gianluca Panto.

In merito ałe notisie de stanpa e indiscresion aparse su internet su na tratativa in corso co altri partiti, se ribadise ancora na volta kel Partito Nasional Veneto nol xe proprietà privata de singołi esponenti e ke da statuto nol gà plenipotensiari in grado de ciapar decixion su temi ke vaga oltre el mandato ricevùo dała propria asenblea dei soci (el Major Consejo) e ke prexe de poxision ke prevede un canbio de linea połitica sostansiałe rikiede na aprovasion de na nova asenblea.

A ogni modo se mete ben in ciaro da suìto ke no podarà esar aprovae linee połitike divergenti dal’obietivo fondante del PNV, che prevede de domandar l’esplisito mandato ai eletori Veneti par indir un referendum pa l’indipendensa del Veneto.

Altri obietivi i sarìa in contrasto coła stesa raxon de esar del Partito Nasional Veneto e noi sarà pertanto ciapai in considerasion.

Uficio Połitico PNV

If you liked my post, feel free to subscribe to my rss feeds