PLEBISCITO.EU | PNV. Press News Veneto

Tolto da GaxetaVeneta

A savemo puìto ca la nàsita del PNV la xé stà ostacolà in tuti i mòdi : da parte de tuto el Venetìxmo, da parte de l’exersito italian traverso i caranba co minase e parcoixision, da parte de la Lega, da parte de la stesa Liga Veneta. Le justifegasion pa sto ostrusionìxmo le ga na sola raìxa ca tùti sèrca de mascaràr e scòndar : “on partito independentista el raprexenta on vero problema pa chi ca vol l’imobilixmo”. El PNV el ga scavesà on tabù e el xè lì ca amonìse tùti e li intimidìse.

Parlemo de fàti concrèti e vardemo còsa ca a xè drìo ocòrar so ste elesiòn rejonàl :

-La Liga e la sànca le ciàpa paùra e le sèrca aleànse Vènete da contrapòr a la Lèga Nord. Sa la Lega la òfre el federalìxmo, la sànca la òfrirà de pì.

-E la Lèga Nord la xè obligà rilansàr, parchè a xè ridìcolo parlàr de federalìxmo co ghe xè on PNV ca parla de Independensa. La Lega la xè obligà xugàrse l’òltema càrta credìbile : “Zaja”. La Lega la xè obligà metar su on Vèneto scèto ca a parla Vèneto e ca propòn de insegnàr Veneto inte le scòle. El mesàjo el xé : “pi Vèneti de cusì a no se pol”.

Parlar de independensa a vol dìr screditàr no sòlo na Lega ca la pàrla de on rìdicolo e inproponìbile federalixmo fiscàl e ca la tol i Vèneti pal da drìo da 20 àni, ma vol dìr propòr na svòlta radegàl e coalitatìva co tùto el modo de fàr politega.

L’existensa stesa de on partìto, de na fòrsa istitusionàl ca la profesa l’independentìxmo, deventa on spauràso ca òbliga tùte le fòrse polìteghe métar de pì sol piàto polìtego, e de evitar de fàr brùta figùra. El PNV el xè on vèro deterente ai politeghi ca gà senpre tradìo la nostra Venèsia e portà àcoa roma e l’italianità. Dèso la Lega Nord no la xè pì l’ònega alternatìva ca la fa l’intarese dei Vèneti, ma ghe xè l’orixònte on partito ca el gà scominsià sigàr : ca podemo vivar mejo sa a ghemo el coràjo de cavarse le caéne taliane, ca semo forti e ca xe ròma ca la ga de bexògno de naltri e pì de tùto, ca a xé legàl deventar independenti dòpo 150 ani de dominasiòn e colonixasion taliana.

El PNV el deventa on bastòn, na sòrta de inibitòr pa tùti i grùpi polìteghi e la vèra alternatìva l’imobilìxmo e inpotensa de tùti i partìti ca (anca sa in bòna fède) li ga el lìmite de no capìr ca deventar independenti e delibararse de la italia, a no xe chistiòn de tenpo ma sòl de volontà.