PLEBISCITO.EU | PNV. Press News Veneto

de Gianluca PANTO (candidà Presidente del Veneto del PNV)

Scrivo ste poche righe par nu, al de fora gnanca boni de capirne, li xè, pa antisipar e desmontar tuti i atachi ca li xè drio pareciar sol PNV.
Eventualmente a faren na version in inglese.

Fin coando gaven deciso de partesipar ale rejionali 2010 se stadi studià da parte dei nostri potensial aversari, antri partiti o grupi de poter, preocupà par via de sta nostra decision.

El gaven capi a partir dal autuno scorso, co gavemo catà ca li se inbusava drento inte’i nostri forum, sercando de far inprobabili provocasion e obiesion, sol co l’intento de desmontar l’autostima deI grupi independentisti.

Sicome no sen coatro mone, li se gà scotà e xè sta smontai toco par toco.
Cusita lori li xè coindi scanpà co la coa inte le sate.

Deso ca li gà capì de che portata xè el nostro projieto e coanto forti ca semo li scumizia ver na paura marsa ca ghe la fen a far el scioco.

Noialtri gaven ocupà nel senario politego on spasio mai presidià, ca costrinzarà tuti vègnar pi vanti.
Deso sto paso no li por farlo, parchè li xè inpantanà con la politega italiana e drento chimere cofà la Region a statuto special o el federalismo fiscal, sol ca sogni irealisabili e busie pa tirarla longa.
Cusita ghe ronpemo i vovi.

A sto ponto no ghe resta ca la strada de darne na etiketa.
El nostro conpito el sarà desmontar e denunsiar preventivamente e publicamente el nostro ruolo. Cusita le etikete no le se pol pi picar, parchè le sbrisa via de boto, e ki le tira fora pasa puito cofà bauco.

Prima li gà proà a petarne drento la “Galassia dei autonomisti, tutti piccoli divisi ed in lotta tra loro “.
Pecà ca noilatri non sen autonomisti, ma independentisti. Xè do robe mucio diverse. Elora anca la Lega Nord el xè on partito autonomista.Parchè no la mete drento la galassia ?
De independentisti ghe xè sol cal el PNV, sen da soli, inte’l nostro setor politego no esiste galasie.
Donca sta prima calunia se ga xà sgonflà.

Dopo li gà provà tirarne drento co sta definision ” balordi che parlano in dialetto pacchiani nostalgici del tanko”.
Lo spesor dei nostri articoli e dei nostri discorsi li gà desmontà subito anca sto squalido tentativo al ponto ca li taxe broenti.
I candidati de luri, medhe figure gnanca boni li xè de ciapar in man na pena pa scriar o li taxe col ghigno parchè no li xè boni de parlar o esprimar conseti conplesi.
Li gà xente pagà e stipendià pa farghelo.
Li porten sui programmi, no sui slogan e luri casca suito.

Pì vanti ga scumisia far ironia sola capasità de catar so le firme pa la nostra lista.
Pecà ca ghevimo fato esperiensa co le Provinciali, el cosideto saver far el know how.
Sevimo esatamente coanti toxi sol teritorio ne serviva pa ndar in volta a catarle, coente firme cadauno, coanto tenpo ne serviva. Ven rincurà toxati e firme, scusiando el laoro con largo antisipo, inte’l silensio del duro laoro.
Deso sen a posto e li gavemo asai stuà.

L’ultima la saria coesta ” Nome inportante ma xè sol ca on omonimo”.
In pratega el candidato saria on “banboccione” on ranpegador social, na sorta de poro can, on poareto coalsiasi, ca no gà gnanca skei e che ga festo faturati da sganasar in confronto al vecio fondator del PNE, coelo si cal jiera sior.
Sti kive del PNV invese li xè ca coatro bauchi, drio el ordenar ca li zuga so feisbuk, xente ca gà tenpo da perdar, la fa antro ca confusion.

Pecà ca mi go fato almanco tre ani de atività sol teritorio nei grupi independesti.
Pecà che go vesto ruoli diretivi a l’asociasion dei industriali Trevixo.
Pecà ca go vesto ruoli diretivi ala asociasion nasional italiana de costrutori de cemento.
Pecà ca so stà ciamà nela co mision italiana pa revisionar le norme europee dele costrusion antisismighe.
Pecà ca so sta ciamà al Ministero dei lavori Publisi a Roma cofà esperto de aditivi pal cemento coando ca li pensava de far na normativa nova pa calcestrussi a alta resistensa. Pecà ca i VVF de Trevixo li me gabia ciamà a far lesion de ajiornamento ai so funsionari.
Pecà ca gabia scrito memorie publicà sui ati dela federasion europea dei costrutori in cemento.
Pecà ca so el finansiador privà de majioransa nela produsion del cartoon de Clifford co-finansià dala Rejion.
Pecà ca sona asionista de la testata jornalistega de politega e cultura “Il Piave”.
Pecà ca el mè software inovativo, unego al mondo, xè sta doparà par l’hangar dei F16 a Aviano, la caserma Ederle a Vicensa, el museo Maxxi a Roma.
Pecà ca alcuni tra i pì grandi sentri comersali de Bucarest li sipia stadi progetà dala me società de ingegneria.
Pecà ca so drio verdhar na società veneta industrial pa far sentrali fotovoltaiche.
Pecà ca so drio verdhar na società de costrusion in Tunisia.
Pecà ca in Venetia mi gò realisà coalche milion de metri coadri de capanoni, no go serto bisogno de presentasion. No ghe xè paese o paesete dela Venetia indò no ghe sipia na realisasion. Pecà ca nel coartier del Piave o nel padovano Veggiano-Rubano-Due Carrare-Piove di Sacco a ghe sipia intiere xone industriali artigianai col nome de la me asienda.
A go ciapà in man l’asienda de famejia, radopià faturati e utili, firmà F24 da far tremar le ganbe, pagà coatordese volte l’ano stipendi a 120 dipendenti co relative tase e contributi.
Fato contrati de milioni de euro, tratative co le pedhori mediatori de canpagna e serpi de sto mondo, no cogno serto ver paura de sti paiasi co la pena in man. Ma ndò viveli, cosa mai vurisei vegnar insegnarne noilatri sti kive.

Me sa ca li gà sbajià indariso. Mejio ca li vaga indò ghe zente ca a 50 ani no la ga mai incora laorà in vita soa. Seguro dentro el PNV no se ghe ne cata zente cusita.
E defati nela nostra scoadra te cati sol ca persone ca in on modo o che altro le se gà distinto nea so vita e ca mi personalmente stimo.

Asemoli che li ne atache, ansi mejio li ne fà publisità. No me intaresa gnente ver boni raporti col potere dominante, tanto i me clienti serca antro ca la coralità mejio al preso pì baso, e la xè tuta zente ca la pensa cofà mi, ca ga le bae sgionfe, ca le ne incorajia, ca la spera de vèdarne cresar.Parto dal presupposto ca on prodotto veneto gà sempre da esar 10 volte mejio de on italian, come qualità servisio conpetense. E pa farlo studio e laoro anca noti intiere, dormo sempre poco, me basta 4 ore.
E co rivo dal clinte a sti pori grami italici ghe faso sempre far a figura dei paiasi. El duro laoro, la tenacia che te porta a na coalità superior.
E sto sistema ghe lo porto drento al PNV indò no cato altro ca zente compagna de mi colta e determinata a anca na scianta stakanovista.
E desmontemoghe tute ste etiketaturte, basta ver pasiensa, toco par toco, metodicamente, in tuti i anbiti e anbienti dela nostra lota, tra de noilatri, coi amisi, coi parenti, soi blog, soi jornali sole tilivision, senpre.
Mandemo vanti el tantan, desmontemo la disinformasion coi nostri medhi libari.
Sti pori busiari i la ghe prova, ma li xè drio scotarse da lori soi. L’invidia la ghe brusa.
Credime, li cria cofà i puteli parkè li gà na paura marsa, a ghe rovinemo tuti i xughi.

Gianluca PANTO
candidà presidente del Veneto
Partito Nasional Veneto