PLEBISCITO.EU | PNV. Press News Veneto

Par la prima volta stasera vivo na esperiensa nova da cuando ke insieme a un s-ciapo de mati son partìo a convinsar i veneti a iutarme a crear el PNV. Perdoneme se par stasera a scrivo cualcosa ke gà pì na valensa personale ke politega.

Par mi parò xe na sensasion inportante e vojo condividarla.

Stasera el Partito Nasional Veneto el gà organixà na prexentasion publica (nea frasion de Aselogna a Cerea, Verona). E par la prima volta no son sta prexente mi a far da relatore. Cuesta par mi la xe na sodisfasion enorme.

Fin ancuò a gaveo paura, a son sincero. A gaveo paura ke, par exenpio, se me malavo, opur se i me meteva in galera, la makena del Partito Nasional Veneto la podeva esar fermada. Adeso so ke no xe pì cusì. El PNV el xe cresùo tanto, e cuesto me dà finalmente un gran solievo. E na gran sodisfasion, parké finalmente poso scumisiar a pensar a cuando ke ghe sarà un me sostituto.

Sì, deso finalmente so co certesa kel PNV el gà conpletà el so proceso de start-up, pa doparar un termine de moda nele nove inprexe tecnologike. Deso a semo in grado de far paura a tuti i concorenti politici, parké no dipendemo pì da singole persone.

E le prosime elesion no canbiarà na virgola del proceso ke ne portarà al’indipendensa. Un 0,1%, un 1% , un 5%, o anca na nostra eliminasion coata par na chiuxura antidemocratica mascarà da decixion burocratike no pol pì inpedir la cresita de na nova straordinaria clase dirigente indipendentista.

Par mi – e scuxeme ancora pa stavolta el pasagio personal – xe na cuestion de gran orgolio e sodisfasion.

Cari veneti, no ste preocuparve, stavolta la gramegna independentista la gà fato raixe e no la more pì!

giane