PLEBISCITO.EU | PNV. Press News Veneto

In te na intervista del 25 de Xenaro, el candidà presidente del centro-destra el gà dito che “non ha senso richiedere l’autonomia per la sola provincia di Belluno”. La poxision del Partito Nasional Veneto invese ła xe ła seguente: si salvi chi può. El PNV xe el partito “Nasional” veneto ma no par cuesto el xe inamorà dei confini aministrativi deła Regione Veneto, dei confini antistorici inposti dal stato talian. Al contrario de Galan e el so sucesor, noialtri no semo mia contrari a inisiative autonomiste de inisiativa popołare, che łe vegna da Portogruaro, da Lamon, o da l’intiera provincia de Beluno. I citadini no i xe mia proprietà deła Regione Veneto, e i ga tuto el dirito de decidere soto che aministrasion stare. Su tuto l’arco alpin da Aosta a Udine, solo Belun e la Valtelina (roba’ ala Svisera da Napoleon par aneterla al so Regno d’Italia) no i ga statuto speciale. No tuti i veneti i ga da vivare rento ła Regione Veneto. Ałora ben vegna l’inisiativa de far de Beluno na provincia autonoma, ma gavemo però da sotolinear i difeti rispeto al percorso indipendentista.

Al momento el comitato par l’autonomia de Beluno el gà rancurà 200 firme par domandar al consilio provinciale de aprovar el percorso referendario. In Provincia i xe drio spetar l’ok “informałe” dal Ministero dei Interni, par eser sicuri de no pestar i pie a nisuni. E xa se capise che co politici locali teserà in partiti taliani se fa poca strada, parchè apunto i xe bituà spetar ordini. Anca se riva l’ok inplicito, el comitato el gavarà da rancurar 8000 firme par render fatibile el referendum su na popolasion provinciale de 214026 abitanti (dati Istat). Ma anca na volta fato el referendum, che sensa dubio el gavarà exito poxitivo, l’ultima paroła ła speta al parlamento talian, che pol senpre dir de no a presindare dała vołontà popołare. Cosa ghe costeło al stato talian mołar Beluno?

El grafico se baxa su dati tólti dai Conti Pubblici Territoriali del Ministero del Tesoro. Le regioni autonome (Trentino-A.A., Val d’Aosta e Friuli V.G.) łe se tien presapoco łe proprie risorse fiscałi: no ghe xe gran difarensa fra ła bara rosa (łe tase) e ła bara grixa (i servisi publici che ste tase dovaria finansiar).

No ghe xe dati detalià par Beluno, ma soło par tuto el Veneto. Savendo che ła popołasion de Beluno provincia ła xe el 5% de cueła veneta, podemo dedur l’atuałe situasion fiscałe: Beluno paga 3 miliardi de tase ogni ano, e ghe torna indrio come servisi publici (da comuni, provincia, regione e stato talian) €2.2 miliardi. Conceder l’autonomia a Beluno costaria al stato talian €800 milioni ogni ano. Par carità, i xe tase tolte ai bełunexi che no ghe torna indrio come servisi, ma dato che ła xe na decixion del parlamento talian a xe ciaro patoco che no łà vegnarà mai concesa.

Xe anca ciaro parché i połiticanti in Regione Veneto łi xe contrari. Se el biłancio regionałe (presapoco €10 miliardi ogni ano) el xe proporsional ała popołasion, cavarghe el 5% (ła popołasion de Beluno provincia) voria dir cavarghe €500 milioni dała gestion de połitici in Regione Veneto par darli in gestion a Beluno. No i xe miga bruscandołi.

Insoma Beluno se cataria come minimo co €500 milioni de risorse da gestir in caxa. E cuesto catandose co na autonomia poareta come el Friuli, dove soło un sesto dełe risorse łe vien gestie dała regione (€3.3 milardi su €19.3 miliardi).

Ma se i xe boni de otegner na autonomia tipo Trentino i podaria gestirse almano el 50% dełe proprie risorse, e cioè grosomodo €1.5 miliardi.

No ghe xe dubio che co ste cifre Beluno deventaria mejo del Sud Tirolo. E no ghe xe gnanca dubio che tałe concesion fata dal stato talian ła xe inposibiłe: no ghe pol eser consenso połitego in parlamento talian; no ghe xe posibiłità de manovra economica par cifre intorno el miliardo de euro.

Invese de perder tenpo co el labirinto kafkiano autonomista, Beluno ga tuti i numari par organixar on referendum co monitoragio internasional, stile Groenlandia o Scozia, e otegner diretamente l’indipendenza sensa bixogno de aprovasion taliana. Se el resto del Veneto ghe vien drio, mejo, se no Bełuno no ga da spetar nisuni.

La vixion del PNV ła xe de na confederasion veneta dove tute łe province (no soło Beluno) łe ga piena autonomia. Ma par otegner on referendum co monitoragio internasional, xe necesario eser raprexentà da połitici che vol far sto percorso indipendentista. Sevitar col percorso autonomista tramite partiti taliani el xe controproducente parchè sciavo de on potere decixionałe che ała fine fa cao a Roma.

Lodovico Pizzati
Presidente – PNV