PLEBISCITO.EU | PNV. Press News Veneto

A xe rivà el vento gelido de la crua realtà, e no sto parlando de el clima, ca ansi el ne ga portà a la normalità, co fiumi e lagheti ingiasà da caminarghe insima come me capitava da bocia. Dati statistici no ghe ne go in man, ma da le informasion ca sento in volta la temperatura de la economia vicentina la xe drio petar ai minimi. Anca se talune imprexe le tien bota, altre le xe in serie dificoltà completamente sensa ordini.
Epure se vardemo in volta, se vede ca in altri paexi le robe le se move. In Svisara par exempio ghe xe on certo movimento, al punto ca le pagine de oferte de lavoro le xe piene de proposte. In Germania la situasion la xe a mace, co zone bone e manco bone, ma co prospetive de mejorar e dognimodo no ghe xe na situasion de bloco total.
Discutendo uncò co on amigo, se paciolava de la posibilità de proporse in altri paexi EU. Ma co coali vantaj economeghi? Contro el gavaria la distansa, la lengoa, la notorietà. Pro el podaria ver, oltre la so profesionalità e el servisio, …e el preso? No, pecà ca el preso invese el xe comparabile al costo de na imprexa equivalente todesca, se no el decide de dimezarse el stipendio e coelo dei so colaboradori.

Alora se ga da domandarse, ghe xe margini par eser pì concorensiali? Inte on marcà svilupà fà coel todesco no ghe xe spasio par eser pì tecnologici, e oramai gnanca pì creativi, dato ca anca i todeschi se ga notevolmente svilupà in fato de creatività.
Resta el preso. Ma ghe xe spasi de manovra par modular el preso?

El preso ca vien domandà el xe funsion de i costi ca na imprexa soporta, e rento sti costi intel scatolon itaja ghe xe na feta de el 70% costituia da tase, ca par leveli “standard” de retribusion el xe considerabile fà on costo fiso. La parte pì importante del costo donca no la xe inte le man de la imprexa, ma la xe inte le man de la politega centrale. Inoltre anca i costi acesori (corente, servisi, fornidure, evc.) i soporta el péxo de sto “costo fiso”, incrementando el sfavore par le nostre imprexe.
Frente sta situasion no ghe xe manovra gnanca a level regional. Xe par coesto ca mi quando i me domanda de sostegner *anca* la autonomia a ghe digo de no, parché saria na contradision, saria sostegner na ipocrixia a parlar male o na semplice ingenuità a parlar ben.

Tanti i pensa ca ver autonomia saria utile, parché a se dixe ca on pochi de skei in pì restaria in caxa. Ben, ametendo anca ca Roma concedese l’autonomia, e se anca fuse posibile ca la region la dase indrio sti skei de tase, podaria anca eser na solusion intermedia. Ma anca fuse sto sogno na realtà, no la podaria farlo isteso, ovèro anca se la region la se tegnese i skei de tase come Bolzan, no la podaria darli indrio a le imprexe (in quanto se figuraria na sorta de sostegno governativo a le imprexe, vietà da le norme europee). Anca Bolzan co tuta la so autonomia no la pol mia decidar na IVA diversa, né aliquote fiscali diverse, e gnanca difarenti formule contributive “sociali” (in realtà le xe isteso tase), ovèro coele ca le xe reali mexure ca le và incidar so i costi “fisi” de le imprexe.
La autonomia de fato la xe valida par ver bele scole, strade nete, servisi publici, e …batineve novi, ma no de securo par far politeghe favorevoli a el svilupo de la economia.

Claudio G.