Republica Veneta e Debito Italian

Ala rinasita de no Stato Veneto Indipendente come ła metemo coi €1800 miliardi de debito publico ke gà lo stato italian? Ne toca ereditarne na parte? In baxe ała percentuałe de redito o popołasion veneta rispeto ała Repubbblica Italiana? O ghe li łasemo tuti a łori?

Vardando recenti caxi europei de indipendenza pacifica e legałe, vedemo ke no ghe xe mia na prasi standard. In molti caxi i neonati stati indipendenti (Montenegro, Lituania, Letonia, Estonia…) no i gà mia eredità gnanca na parte del debito publico dei so ex contenitori geopołitici. Al contrario, Ceki e Slovaki i se gà acordà de divìdarse debiti (e crediti) co on raporto de 2 a 1.

Come se conportaremo noialtri veneti col debito ingrumà su dal stato italian? Intanto se gà da vedar cuanto ghe sarà ancora de debito talian el giorno de l’indipendenza, parké podaria benìsimo èsarghe on default antecedente ała nostra indipendenza. Ma se par caxo ghe ne vansàse, e me tocàse nar mi a pategiar łe tratative, a go on bel conto de cuanti skei i ga da rixarcirne łori. Propi come ke łe fa łe ex cołonie coi so sfrutatori.

Sto grafico ne fa vedar ła difarensa de cuanto ke i veneti i paga de tuti i tipi de tase (linea rósa) e cuanti de sti skei ke i vien spexi ntel nostro teritorio come servisi publici comunałi, provinciałi, regionałi o nasionałi (linea blu). Sti ki i xe dati uficiałi del Ministero del Tesoro tolti dai Conti Pubblici Territoriali. Xe probabiłe ke el divario el sipia anca magiore, ma almanco sti ki i xe i skei ke i amete łori de robarne ano dopo ano. Sti dati no i xe disponibiłi prima del 1996 o dopo el 2007. Pasiensa, limitemose a cuel ke i xe disposti a ameter uficialmente łori.

miliardi de euro	ENTRATE FISCALI	SPESA PUBBLICA	DIVARIO NOMINALE	DIVARIO REALE*
1996	42.6	36.2	6.3	8.3
1997	46.6	35.7	10.9	14.1
1998	47.7	36.7	11.0	14.0
1999	51.7	38.8	12.9	16.0
2000	52.0	40.1	11.9	14.5
2001	55.5	42.5	13.0	15.5
2002	54.9	44.4	10.5	12.3
2003	60.9	46.1	14.7	16.9
2004	59.0	46.8	12.1	13.7
2005	58.4	48.5	9.9	10.9
2006	66.4	49.4	17.0	18.4
2007	69.5	50.8	18.7	19.8
TOT	665.0	516.2	148.9	174.4

*tegnendo conto de on modesto 2% de inflasion anua

Soło contando sti dódexe ani de dati disponibiłi i ne gà cavà €150 miliardi. Femo anca de manco de tegner da conto i interesi, ma come minimo almanco tegnemo conto de l’efeto inflasion (no semo mia oki del tuto), e ne vien fora €175 miliardi.

€175 miliardi ke lo stato talian amete de ver tólto in pì de cuanto ke in teoria a ne dava a na popołasion veneta de 5 milioni de abitanti. Vol dir ke se doman semo indipendenti i ne dovaria dar come minimo on rixarcimento dani de €35 mila a testa (€140 mila euro a na fameja de 4 persone come rixarcimento par deceni de sfrutamento). Cuesto da xontar ai €4000 a testa ke sparagnarmeo ogni ano (come manco tase o pì servisi) sensa el stato talian su ła gropa.

No i pol dir ke el debito italian el xe stà acumułà anca par naltri veneti, parché i veneti i xe senpre stà creditori verso el stato talian. Sicuramente no gavemo vuo gnisun beneficio da sto indebitamento. Sensa de naltri i saria ncora pì indebità. Dove xełi i me €35 mila?

No i pol dir ke na grosa feta de sto debito talian el xe in man, in forma de BOT e BTP, de sparagnatori veneti, e ke i xe afari nostri. El stato talian el ga on dovere rispeto a sti investitori (anca veneti). Se i nostri veci i se fida a tegner in man sti toki de carta del texoro talian, a so riscio e pericoło. Mi vojo i me €35 mila.

No i pol gnanca dir ke el popoło talian el xe uno e indivixibiłe e ke no se pol mia contar debiti e crediti in fameja. No xe vero, parké savemo ke i veneti i costituise on popoło a sé stante co tanto de diriti riconosùi a liveło internasional. La lege italiana stesa ła ne riconose come “popoło” (vedi Articolo 2 del Statuto Regionale; lege italiana). E come popoło gavemo dei diriti internasionałi soto scriti dal stato italian col pato de New York ntel 1977. Dame sti benedeti me €35 mila ke te me vansi.

No i pol gnanca dir ke sicome in tuti sti ani gavemo votà in masa partiti italiani a favore de l’unità del stato italian, ałora ghe xera na inplicita aprovasion de sto periodico sfrutamento. No i ło pol dir parké fin al 2006 no i ne łasava gnanca votar on partito indipendentista. Ła pena par costitutir o suportar on partito indipendentista ła xera l’ergastoło, secondo ła vigente lege fasista in pie dai ani ’30. Al masimo se podeva domandar col capel in man par l’autonomia o el federałismo, ke comuncue inplicava l’apartenensa al stato italian e precludeva el dirito, come popoło, de vegner rixarcio da deceni de sfrutamento. €35 thousand, please.

Deso sta lege fasista ła xe stà cavà via grasie a presion da l’Union Europea. Deso podemo finalmente, e par ła prima volta, votar el primo partito indipendentista: el Partito Nasional Veneto. Votando PNV podemo publicamente domandar sti €35 mila a testa, oltre ke a asicurarse ła felicità de €4 mila a testa ogni ano da deso in vanti.

L’unica roba ke i podaria dir xe ke dati i rixultati dełe regionałi del 2010, soło na picoła percentuale de votanti a se riconose come popoło veneto indipendente, staltri ghe va ben eser italiani, ełora i gà da rixarcir poco o gnente. Par cuesto gavemo da votar PNV, par far vedar a ogni ełesion ke se riconosemo come popoło e ke vołemo i nostri €35 mila indrio. El PNV sta primavera el ciapa soło l’1%? Va ben, na volta indipendenti podaremo insistere soło su l’1% de kei €175 miliardi de rixarcimento cołonixasion: €1.75 miliardi (€350 a testa). Ciapémo el 2%? Sarà €700 a testa.

Gavemo da rendarse conto ke ste regionałi łe xe dełe ełesion inportanti, anca se el nostro futuro governatore el xe stà decixo on mexe e mexo fà a Milan. Pol parer insulso nar votar par aclamar on rixultà xà scontà, ma el vero segnałe xe ła prexensa del primo partito indipendentista veneto. Serkemo de far numaro el pì posibiłe votando PNV parké vołemo indrio i nostri €35 mila, deso.

Lodovico Pizzati
Presidente – PNV

If you liked my post, feel free to subscribe to my rss feeds